Jer astynda eńbegimiz úshin alatyn ailyǵymyz nebári 51 myń 663 teńgege áreń jetedi degen olardyń tipti sońǵy ret qashan et jegenderi esterinde joq.
"Jurt bizdi 200-diń ústi, kóp alady dep oilaidy. Eger senbeitin bolsańyzdar, esep paraqshasyn kórsetýge bolady. Sońǵy qymbatshylyqty bilesiz, qandai bolyp jatqanyn, ol eshteńege de jetpeidi. Tipti ony aityp jatýdyń esh qajettigi joq", - deidi "Almatymetroqurylys" AQ jer asty úngýshisi Pahrdin Musaliev.
Arna málimetinshe, "Almatymetroqurylys" kompaniiasynyń eń aýyr jumysyn atqaratyn azamattardyń ailyǵy túbirtek boiynsha bar-joǵy 76 635 teńgeni quraidy. Zeinetaqy men meditsinalyq saqtandyrý qory, taǵy kásipodaq jarnasyn tólegende qoldaryna nebári 51 663 teńge tiedi eken.
"Aitsaq, "qaryzbyz biz" deidi. Ol bastyqtyń bizge aitqany: senderdiń ailyqtaryń 60 myń! 60 myń teńge azyq-túlikke ketti. Onyń ishine etti qospańyz. Et ol bólek, etti qaryzǵa baryp alamyz. Sonymen qaryzǵa istep júrmiz bylai qarap tursańyz. Biz shahterdiń de jumysyn istep jatyrmyz, qurylysshynyń da jumysyn istep jatyrmyz, sylaqshy, tehnichka deidi, jer astynda solardyń báriniń jumysyn istep jatyrmyz. Metro júrsin dep júrmiz", - deidi "Almatymetroqurylys" AQ jer asty jumysshysy Daýytbai Almat.
Buǵan qosa, olar 100-ge tarta jumysshy qýyqtai ǵana bólmede jýynatyndaryn jetkizdi. Sózderinshe, tórt adamǵa arnalǵan tar monshada tún ortasyna deiin uzyn-sonar kezek. Onyń ózi qabyrǵasyn kók basyp, tóbesi qulaǵaly tur.
Jumysshylardyń kiim aýystyratyn bólmesinde tyshqan qaptaǵan. Munda olar tek kiim ǵana aýystyrmaidy, osynda jýynady, tamaq ishedi. Kógergen iispen tynystap, shań jutqan qurylysshylardyń birazy densaýlyǵynan aiyrylyp, endigi múgedek atanǵan. Alaida jer astynda júrip tapqan dertti emdeýge kompaniia kók tiyn de tólemeidi eken.
Óz kezeginde uiym basshylyǵy bul týraly pikir bildirýden bas tartty.
Qurylysshylar jaǵdailary jaily máslihat depýtatyna da shaǵymdanypty. Alaida ol qurylys ornyna bir kelgennen keiin ushty-kúili joǵalyp ketken.
Qurylysshylarǵa qamqor bolady dep memleket osy nysanǵa bekitken maslihat depýtatyna da shaǵymdanypty. Onda halyq qalaýlysy qurylys basyna kelgen. Alaida artynsha koronavirýsqa shaldyqtym dep, at izin kesipti. Sodan beri úsh ai ótkenimen, depýtat otandyq dárigerlerge senbeitin bolsa kerek, shetelge taǵy emdelýge ketipti.
"Men emge shetelge kettim. Shetelde emdelip jatyrmyn. Qazir sol jaqtamyn. 18-shildede bolamyn. Men sol kezde aittym, ol máseleni kóteremiz dep, birinshiden, senderdiki metroqurylys jekemenshik kompaniia, oǵan biz qatty tiise almaimyz. Óitkeni ózderi biledi", - deidi Almaty qalasy máslihatynyń depýtaty Esengeldi Talbidinov.
Budan bylai 51 myń teńge ailyqqa tózbeimiz degen jumysshylar metro qurylysyn toqtatyp, úidi-úiine tarasty.
https://www.youtube.com/watch?v=lNM4uAb4sFY
