Tasqynnyń alǵashqy kúni Syrym aýdany boiynsha 402 úi sýǵa ketti dep habarladyq. Keiin aýdannan arnaiy komissiia qurylyp, úilerdi aralap, keltirilgen shyǵyndar týraly akt jasaldy, dep habarlaidy Dalanews.kz saity BQO ákimdigine silteme jasap.
Búgin Syrym aýdanynyń ákimi Jumageldi Batyrniiazov naqty derekterdi málimdedi.
Esepteýler alǵashqy kúni kósheler boiynsha júrdi. Keiin komissiia úi – úidi aralap, turǵyndarmen kezdesip, zalaldaryn tirkedi. Qazirgi tańda Syrym aýdany boiynsha 236 úi sýǵa ketkeni málim bolyp otyr. Sonymen qatar 8 jylqy, 62 bas iri qara jáne 239 usaq mal shyǵynǵa ushyraǵan, – dedi aýdan ákimi. Sonymen qatar Syrym aýdanyna óńir basynan tehnikalyq zertteý tekserý komissiiasy kelip, sýǵa ketken baspanalardyń jai – kúii boiynsha resmi qorytyndylaryn shyǵardy. Qazir Syrym aýdanynda turýǵa kelmeitin 84 úi sanalyp tur.
Elimizdiń ár óńirinde tasqyn bolýda. Sýdan zalal tartqan aýyldar kóp. Jaǵdaidy QR Prezidenti Qasym – Jomart Toqaevtyń ózi baqylaýǵa aldy. Jýyrda aýdanymyzǵa QR Parlamenti májilisiniń depýtattary keldi.
Tabiǵi apattan bolǵan shyǵyn óteledi dep jatyr. Halyqqa kelgen shyǵyn ártúrli. Sýda turǵanǵa shydamai, qabyrǵasy sógilgen, qulaǵan úiler bar. Bireýlerdiń úiine sý bilinbegen, biraq qosymsha sharýashylyq qurylystary qiraǵan. Naqty sheshim aldaǵy ýaqytta shyǵady, Syrym aýdanynda sý tasqynynan keiin úii turýǵa jaramai qalǵan turǵyndardyń igiligine baspana qurylysy bastalýy tiis dep oilaimyn. Qadyr aqyn «Eń aldymen el qamy, Odan keiin qalǵany!» - degendei eń aldymen eldiń basty shyǵyny – baspanany qalpyna keltirýge mindettimiz. Qalǵan dúnieniń oryny bola jatar. – dedi Jumageldi Batyrniiazov.
Aita keteiik, qazirgi tańda Syrym aýdandyq halyqty jumyspen qamtý jáne áleýmettik baǵdarlamalar bóliminiń tarapynan dúlei apattyń nemese órttiń saldarynan japa shekken otbasylarǵa tólenetin 184 600 teńge kólemindegi bir rettik materialdyq kómek tólene bastaldy. Búgin 54 úige materialdyq járdemaqysyn alyp úlgerdi.
