Ózbekstanda memlekettik qyzmetkerlerdi sybailas jemqorlyqtyń saldarymen tanystyrý úshin olardy túrmeler men jazasyn óteý mekemelerine aparý tájiribesi engizildi, dep habarlaidy dalanews.kz.
Bul bastamany Ózbekstannyń Sybailas jemqorlyqqa qarsy kúres agenttigi Ishki ister ministrligimen birlesip qolǵa alǵan. Joba 2026 jylǵa arnalǵan jemqorlyqtyń aldyn alý jónindegi is-qimyl jospary aiasynda júzege asyrylyp jatyr.
Agenttik málimetinshe, profilaktikalyq saparlardyń negizgi maqsaty – memlekettik qyzmetkerlerge jemqorlyq qylmystarynyń aýyr zardaptaryn naqty kórsetý, zań buzýshylyqtyń sózsiz quqyqtyq jaýapkershilikke ákeletinin túsindirý jáne qyzmettik ókilettikterdi tek memleket pen qoǵam múddesine sai paidalanýǵa yntalandyrý.
Alǵashqylardyń biri bolyp mundai mekemelerge Qurylys jáne turǵyn úi-kommýnaldyq sharýashylyq ministrliginiń, sondai-aq Kadastr agenttiginiń qyzmetkerleri bardy. Sapar barysynda sheneýnikter mekeme aýmaǵyn aralap, sybailas jemqorlyq qylmystary úshin sottalǵan azamattarmen kezdesti.
Agenttik ókilderiniń aitýynsha, mundai áńgimeler memlekettik qyzmetkerlerge jemqorlyqtyń saldary tek qylmystyq jaýapkershilik pen bas bostandyǵynan aiyrýmen shektelmeitinin, onyń adamnyń bolashaǵyna, otbasynyń ál-aýqatyna jáne qoǵamdaǵy bedeline eleýli ziian keltiretinin túsinýge múmkindik beredi.
Bilik aldaǵy ýaqytta mundai profilaktikalyq saparlarǵa memlekettik organdardyń basshylaryn jáne jemqorlyq táýekeli joǵary salalarda jumys isteitin qyzmetkerlerdi kezeń-kezeńimen tartýdy josparlap otyr.
