Өзбекстанда мемлекеттік қызметкерлерді сыбайлас жемқорлықтың салдарымен таныстыру үшін оларды түрмелер мен жазасын өтеу мекемелеріне апару тәжірибесі енгізілді, деп хабарлайды dalanews.kz.
Бұл бастаманы Өзбекстанның Сыбайлас жемқорлыққа қарсы күрес агенттігі Ішкі істер министрлігімен бірлесіп қолға алған. Жоба 2026 жылға арналған жемқорлықтың алдын алу жөніндегі іс-қимыл жоспары аясында жүзеге асырылып жатыр.
Агенттік мәліметінше, профилактикалық сапарлардың негізгі мақсаты – мемлекеттік қызметкерлерге жемқорлық қылмыстарының ауыр зардаптарын нақты көрсету, заң бұзушылықтың сөзсіз құқықтық жауапкершілікке әкелетінін түсіндіру және қызметтік өкілеттіктерді тек мемлекет пен қоғам мүддесіне сай пайдалануға ынталандыру.
Алғашқылардың бірі болып мұндай мекемелерге Құрылыс және тұрғын үй-коммуналдық шаруашылық министрлігінің, сондай-ақ Кадастр агенттігінің қызметкерлері барды. Сапар барысында шенеуніктер мекеме аумағын аралап, сыбайлас жемқорлық қылмыстары үшін сотталған азаматтармен кездесті.
Агенттік өкілдерінің айтуынша, мұндай әңгімелер мемлекеттік қызметкерлерге жемқорлықтың салдары тек қылмыстық жауапкершілік пен бас бостандығынан айырумен шектелмейтінін, оның адамның болашағына, отбасының әл-ауқатына және қоғамдағы беделіне елеулі зиян келтіретінін түсінуге мүмкіндік береді.
Билік алдағы уақытта мұндай профилактикалық сапарларға мемлекеттік органдардың басшыларын және жемқорлық тәуекелі жоғары салаларда жұмыс істейтін қызметкерлерді кезең-кезеңімен тартуды жоспарлап отыр.
