Batys Qazaqstan oblysynyń Bórli aýdanyna qarasty Jarsýat aýylynda Respýblika kúni qarsańynda 108 oryndyq jańa jalpy bilim beretin mekteptiń saltanatty ashylýy ótti, dep habarlaidy Dalanews.kz.
Mektep KPO kompaniiasynyń áleýmettik-infraqurylymdyq jobalary aiasynda salynǵan. Oqý ordasy oqýshylardyń bilim alýyna qolaily jaǵdai jasap, joǵary sapaly bilim berý úshin qajetti barlyq jabdyqpen qamtyǵan.
Jańa ǵimaratta 12 zamanaýi oqý kabineti bar, onyń 10-y interaktivti taqtalarmen jabdyqtalǵan. Sonymen qatar mektepte 2 sheberhana, informatika kabineti, sport zaly, 70 oryndyq akt zaly jáne 30 oryndyq ashana qarastyrylǵan. Mektep aýlasynda oiyn alańy, fýtbol jáne basketbol alańdary, júgirý joly, sporttyq alańy jáne demalys aimaǵy bar.
Batys Qazaqstan oblysynyń ákimi Nariman Tóreǵaliuly jańa mektepti aralap, muǵalimder men oqýshylardy jáne olardyń ata-analaryn osy mańyzdy oqiǵamen quttyqtady. Aimaq basshysy aýyldyq jerlerdegi bilim berý infraqurylymyn jańǵyrtýdyń mańyzdylyǵyn atap ótti.
“Prezident aýyl mektepterin jańǵyrtyp, olardy qajetti qural-jabdyqtarmen tolyq qamtamasyz etýge naqty tapsyrma bergen. Búgin osy josparlardyń júzege asyp jatqanyn kórip otyrmyz. Bul jańa mektep balalar úshin bilim men damý ortalyǵyna ainalsyn. Ol oqýshylardyń bolashaqtaǵy jetistikterine jol ashatynyna senimdimin”, – dedi Nariman Tóreǵaliuly.
Aita keteiik, jańa mektepte 29 pedagog eńbek etip, oqýshylarǵa sapaly bilim men tárbie beredi. Mekteptiń ashylýy aýyldyq jerlerdegi bilim sapasynyń artýyna úles qosady.
Bórli aýdanynyń bilim berý ardageri Roza Ahmetova jańa mekteptiń aýyl turǵyndary úshin kópten kútken qýanysh ekenin atap ótti.
“Jańa mektep – aýyl balalary úshin úlken qýanysh. Buǵan deiin olar eski mektepte bilim alyp keldi. Memleket basshysyna aýyldyq jerlerge kórsetken qoldaýy úshin alǵysymyz sheksiz”, – dedi Roza Ahmetova.
BQO-da qazirgi tańda Prezidenttiń tapsyrmasy boiynsha "Jaily mektep" ulttyq jobasy aiasynda 8100 oryndyq 9 mekteptiń qurylysy júrip jatyr. Onyń 3-eýi biylǵy jyldyń sońyna deiin tapsyrylmaq.
KPO kompaniiasynyń bas direktorynyń orynbasary Muhtar Mankeev óz sózinde kompaniianyń oblystyq ákimdikpen birlesip aýyldyq jerlerde 15-shi mektep salynyp jatqanyn aitty.
“Oblys ákimi bastamasynyń aiasynda 2023 jyldan bastap aýyldyq jerlerde mektep salý jáne jańǵyrtý jobasyn júzege asyryp kelemiz. Aýyl balalarynyń sapaly bilim alǵany biz úshin mańyzdy. Búgingi mektep – bizdiń kompaniianyń Batys Qazaqstan oblysynda salǵan 15-shi mektebi”, – dedi Muhtar Mankeev.
Aita keteiik, KPO kompaniiasynyń áleýmettik-infraqurylymdyq jobalary aiasynda 4 mektepte kúrdeli jóndeý jumystary júrgizilýde.
