BQO-daǵy Aqjaiyq aýdanynyń Kónekketken aýylynda jańa feldsherlik-akýsherlik pýnkti qoldanysqa berildi,- dep habarlaidy Dalanews.kz
Bul joba Memleket basshysynyń tapsyrmasyna sáikes aýyl turǵyndarynyń densaýlyǵyn jaqsartýǵa baǵyttalǵan júieli jumystar men «Aýyldyq densaýlyq saqtaýdy jańǵyrtý» ulttyq jobasy sheńberinde júzege asyryldy.
Ashylý saltanatyna Batys Qazaqstan oblysynyń ákimi Nariman Tóreǵaliev qatysyp, aýyl turǵyndaryn meditsinalyq nysannyń ashylýymen quttyqtady.
«Aqjaiyq aýdanynyń Kónekketken aýylynda jańa feldsherlik-akýsherlik pýnkttiń ashylýy – barshamyz úshin qýanyshty ári mańyzdy oqiǵa. Bul — Memleket basshysynyń tapsyrmasyna sáikes aýyl turǵyndarynyń densaýlyǵyn qorǵaýǵa baǵyttalǵan júieli jumystyń jáne «Aýyldyq densaýlyq saqtaýdy jańǵyrtý» Ulttyq jobasynyń naqty nátijesi»,– dedi oblys ákimi Nariman Tóreǵaliev.
Jalpy 2023-2025 jyldary oblysta 50 jańa meditsinalyq nysan salý kózdelgen bolsa, sonyń 39-y búginde iske qosyldy.
Qalǵan nysandardyń qurylys jumystary aiaqtalýyna orai qoldanysqa beriledi.
Kónekketken aýylynda salynǵan jańa meditsinalyq nysannyń aýmaǵy 260 sharshy metrden asady. Kúnine 40-qa jýyq adamdy qabyldaýǵa qaýqarly bul pýnkttiń jobalyq quny – 207 million teńgeden astam. Qurylys jumystaryn «Jienbai» JShS júrgizip, tapsyrys berýshi retinde oblystyq qurylys basqarmasy jumys atqardy.
Kónekketken aýylynyń turǵyny, aýyldyq oǵamdyq keńestiń tóraǵasy Turǵan Saparǵaliev aýylda zamanaýi úlgide salynǵan emhana úshin Memleket basshysyna rizashylyǵyn bildirdi.
«Oblys kóleminde eki jylda 50 meditsinalyq nysan salý - úlken jumys. Prezidentimizdiń halyq igiligi úshin jasaǵan qoldaýyna alǵysymyz sheksiz. Memleket basshysy aýyl turǵyndaryna kóp kóńil bólip otyr. Em alý úshin aýdan ortalyǵyna nemese qalaǵa baratynbyz. Endigi kezekte sapaly emdi óz aýylymyzda da alýǵa bolady”,- dedi Turǵan Saparǵaliev.
