Batys Qazaqstan oblysy politsiia departamenti basshysynyń orynbasary, polkovnik Talǵat Arynovtyń uly Nurjan Arynovtyń isi Joǵarǵy sottyń kassatsiialyq instantsiiasyna jetti. Ol sintetikalyq esirtki zattaryn taratqany úshin 10 jylǵa bas bostandyǵynan aiyrylǵan, dep habarlaidy Dalanews.kz.
26 jastaǵy Nurjan Arynovtyń atyshýly isi 2024 jyldyń mamyrynda bastaldy. Ol kezde qylmystyq is boiynsha sot alqasy ony kinásiz dep tanyp, aqtaý úkimin shyǵarǵan bolatyn.
Alaida, bul sheshim qoǵamda úlken rezonans týdyryp, kópshiliktiń narazylyǵyna ushyrady.
Qoǵamdyq pikirdiń yqpalymen alǵashqy aqtaý úkimi joiylyp, qazan aiynda BQO-nyń qylmystyq ister jónindegi mamandandyrylǵan soty Nurjan Arynovqa qatysty aiyptaý úkimin shyǵardy. Sot ony sintetikalyq esirtkini zańsyz taratty dep tanyp, 10 jylǵa bas bostandyǵynan aiyrdy.
Qazirgi ýaqytta Arynovtyń qorǵaýshylary bul úkimmen kelispei, Joǵarǵy sotqa kassatsiialyq shaǵym túsirdi. Olar isti ádil qaraýdy jáne úkimniń kúshin joiýdy talap etip otyr.
