Oraldaǵy Tuńǵysh Prezident alańynda 4 maýsym – QR Memlekettik rámizder kúnine arnalǵan shara ótti, – dep habarlaidy Dalanews.kz BQO ákiminiń baspasóz qyzmetine silteme jasap.
Saltanatty jiynda QR Memlekettik Gimni oryndalyp, Memlekettik týy kóterildi.
BQO ákiminiń orynbasary Baqytjan Narymbetov halyqty merekemen quttyqtady.
– Sizderdi 4 maýsym – Memlekettik rəmizder kúnimen shyn júrekten quttyqtaimyn! 1992 jyly 4 maýsymda elimizdiń memlekettik rámizderi bekitildi. Halyqaralyq deńgeide moiyndaldy. Bairaǵymyz BUU-nyń tórinde tur. Ony ǵaryshkerlerimiz kók júzine kóterdi. Alpinisterimiz álemniń eń biik shyńdaryna ornatty. Sportshylar jeńis tuǵyrynan jelbiretip, Gimnimizdi shyrqatty. Kúlli álem qazaq elin kók bairaǵyna qarap tanityn boldy.
Memlekettik rámizder – Táýelsizdigimizdiń nyshany, babalarymyzdyń armany jáne ajyramas bóligi. Prezidentimiz ulttyq biregeiligimizdi álemde dáleldeitin eki faktordy atap ótti. Ol– bizdiń Kók tólqujatymyz ben Kók bairaǵymyz. Kók týdyń astynda birigip, bir ult bolyp uiysýǵa shaqyrdy.
«Birlik bar jerde tirlik bar!» degen qazaqtyń dana sózi osyndaida aitylsa kerek. Keshegi 100 jylda bir qaitalanatyn, sý tasqynymen kúresýde Qazaqstannyń túpkir-túpkirinen avtokólikter men azamattar óz erikterimen kelip, úles qosty. Halqymyzdyń eren eńbegi men birliginiń arqasynda 84 eldi meken sý apatynan aman qaldy.
Otandastarymyz zardap shekken jandarǵa jappai qol ushyn sozdy. Bir-birine shynaiy janashyr boldy. Sondyqtan Batys Qazaqstan oblysy Nariman Tóreǵalievtiń atynan sý tasqynyna qarsy kúreste úles qosqan azamattarǵa alǵys aitamyn.
Ákim orynbasary sý tasqynyna bailanysty tótenshe jaǵdai ýaqytynda el úshin aianbai eńbek etken bir top azamatty marapattady.
Olardyń arasynda JOO-nyń rektorlary jáne eriktiler bar.
