Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov 2025 jylǵy 17 naýryzda Májilis dálizinde jýrnalistergen suqbatynda AMÓZ men PMÓZ-di jekeshelendirý týraly usynysqa qatysty túsinikteme berdi, dep habarlaidy Dalanews.kz.
Ol BQDA tarapynan Atyraý jáne Pavlodar MÓZ-derin jekeshelendirý boiynsha usynys bolǵanyn rastady.
"Úkimette aldyn ala talqylaý boldy jáne atalǵan aktivterdegi 50% memlekettiń qatysý úlesin jekege berý týraly usynys aldyn ala kelisildi. Biz muny úlgi bolarlyq Shymkenttegi MÓZ-diń tabysty jumysynan kórip otyrmyz, ondaǵy úlestiń 50%-y jeke menshikke tiesili. Eń bastysy, basqarýdyń jeke nysany qalyptasqan, iaǵni memleket tarapynan laýazymdy tulǵalardyń qatysy joq. Nátijesinde - apattar, tehnologiialyq aqaýlar birneshe ese azaiyp, sáikesinshe jóndeý jumystarynyń kólemi de tómendegen. Bul jeke sektor tarapynan áldeqaida tiimdi basqarý bolatynyn rastaidy", - dedi Rýstam Ahmetov.
Sondai-aq, ol otyn-energetika kesheni salasynda kommýnaldyq menshik nysandarynyń basym bóligin TKSh salasynda jekeshelendirý usynylyp otyrǵanyn atap ótti.
"Alaida, biz olardy jekeshelendirýdiń úshinshi kezeńine jatqyzýdy usynamyz. Onda da osy salalardaǵy retteýshi bazany ózgertýge jáne yntalandyrýshy tarif qurýǵa yqpal etetin barlyq memlekettik baǵdarlamalardy iske asyrǵannan keiin. Naryq jekeshelendirilgen obektilerdiń tabysty jumysyna daiyn bolǵanda, biz memlekettiń úlesi bar osy kúrdeli segmentti de jekeshelendirýge kirisemiz. Birinshi kezeńde biz kompaniialardyń joǵary tabystylyǵy jáne jeke biznestiń aitarlyqtai úlesi baiqalatyn, kommertsiialyq turǵydan qalyptasqan aktivterdi jekeshelendirýdi usyndyq. Bul - TKSh, abattandyrý jáne basqa da qyzmet túrleri", - dep sózin tolyqtyrdy Rýstam Ahmetov.
Buǵan deiin saitymyzda "Atyraý jáne Pavlodar MÓZ-derindegi úlesti jeke investorlarǵa usynyp kóremiz - BQDA tóraǵasy" degen material jariialanǵan bolatyn.
