Premer-ministrdiń orynbasary Qanat Bozymbaev búgin Úkimette ótken baspasóz máslihatynda sybailas jemqorlyq kúdigi boiynsha kólik vitse-ministriniń ustalýyna kim jaýapty bolatynyn aitty, dep habarlaidy Dalanews.kz.
Ol sot úkimi kúshine engen sátten bastap, eger memlekettik organda isteitin adam sybailas jemqorlyq boiynsha sottalsa, onyń basshysy otstavkaǵa ketýge mindetti ekenin basa atap ótti.
"Degenmen tym asyǵystyq tanytyp, úkim shyqpai jatyp, áldebireýdi kináli etýdiń, jazǵyrýdyń qajeti joq dep oilaimyn. Sot sheshimi shyǵýy tiis. Sol kezde sybailas jemqorlyq qylmys jasaldy dep tanylyp, esepteledi. Al oǵan deiin ol tek kúdikti adam. Kez-kelgen vitse-ministr tiisti sala basshysynyń usynysy boiynsha taǵaiyndalady. Ministr usynady, ol adamdar zań boiynsha UQK jáne Antikor jelisi boiynsha ábden tekserýden ótedi. Sodan keiin olar Prezident Ákimshiligine kelisý úshin usynylady, bizdiń qyzmetterimizde, osy keńseniń de óz erejeleri bar. Sodan keiin taǵaiyndaý Úkimettiń qaýlysymen rásimdeledi", dep sózin tolyqtyrdy Bozymbaev.
Búgin kólik vitse-ministri Sátjan Ablalievtyń qyzmetinen bosatylǵany habarlanǵan. Al buǵan deiin Ulttyq qaýipsizdik komitetiniń Sybailas jemqorlyqqa qarsy is-qimyl qyzmeti onyń ustalǵanyn rastaǵan edi. Aldyn ala boljam boiynsha, sheneýnik aqshany Ulybritaniiadaǵy ulynyń oqýyna jumsaǵan. Tergeýshilerdiń paiymynsha, para respýblikalyq avtojol qurylysyna tehnikalyq baqylaý júrgizgen kompaniialarǵa jasalǵan qamqorlyqtyń óteýi retinde berilgen. Buǵan deiin para somasy 78 myń dollardy quraǵany týraly aqparat taraǵan edi.
