پرەمەر-مينيستردىڭ ورىنباسارى قانات بوزىمبايەۆ بۇگىن ۇكىمەتتە وتكەن باسپا ءسوز ءماسليحاتىندا سىبايلاس جەمقورلىق كۇدىگى بويىنشا كولىك ۆيسە-مينيسترىنىڭ ۇستالۋىنا كىم جاۋاپتى بولاتىنىن ايتتى، دەپ حابارلايدى Dalanews.kz.
ول سوت ۇكىمى كۇشىنە ەنگەن ساتتەن باستاپ، ەگەر مەملەكەتتىك ورگاندا ىستەيتىن ادام سىبايلاس جەمقورلىق بويىنشا سوتتالسا، ونىڭ باسشىسى وتستاۆكاعا كەتۋگە مىندەتتى ەكەنىن باسا اتاپ ءوتتى.
"دەگەنمەن تىم اسىعىستىق تانىتىپ، ۇكىم شىقپاي جاتىپ، الدەبىرەۋدى كىنالى ەتۋدىڭ، جازعىرۋدىڭ قاجەتى جوق دەپ ويلايمىن. سوت شەشىمى شىعۋى ءتيىس. سول كەزدە سىبايلاس جەمقورلىق قىلمىس جاسالدى دەپ تانىلىپ، ەسەپتەلەدى. ال وعان دەيىن ول تەك كۇدىكتى ادام. كەز-كەلگەن ۆيسە-مينيستر ءتيىستى سالا باسشىسىنىڭ ۇسىنىسى بويىنشا تاعايىندالادى. مينيستر ۇسىنادى، ول ادامدار زاڭ بويىنشا ۇقك جانە انتيكور جەلىسى بويىنشا ابدەن تەكسەرۋدەن وتەدى. سودان كەيىن ولار پرەزيدەنت اكىمشىلىگىنە كەلىسۋ ءۇشىن ۇسىنىلادى، ءبىزدىڭ قىزمەتتەرىمىزدە، وسى كەڭسەنىڭ دە ءوز ەرەجەلەرى بار. سودان كەيىن تاعايىنداۋ ۇكىمەتتىڭ قاۋلىسىمەن راسىمدەلەدى"، دەپ ءسوزىن تولىقتىردى بوزىمبايەۆ.
بۇگىن كولىك ۆيسە-مينيسترى ءساتجان ابلالييەۆتىڭ قىزمەتىنەن بوساتىلعانى حابارلانعان. ال بۇعان دەيىن ۇلتتىق قاۋىپسىزدىك كوميتەتىنىڭ سىبايلاس جەمقورلىققا قارسى ءىس-قيمىل قىزمەتى ونىڭ ۇستالعانىن راستاعان ەدى. الدىن الا بولجام بويىنشا، شەنەۋنىك اقشانى ۇلىبريتانياداعى ۇلىنىڭ وقۋىنا جۇمساعان. تەرگەۋشىلەردىڭ پايىمىنشا، پارا رەسپۋبليكالىق اۆتوجول قۇرىلىسىنا تەحنيكالىق باقىلاۋ جۇرگىزگەن كومپانيالارعا جاسالعان قامقورلىقتىڭ وتەۋى رەتىندە بەرىلگەن. بۇعان دەيىن پارا سوماسى 78 مىڭ دوللاردى قۇراعانى تۋرالى اقپارات تاراعان ەدى.
