Buǵan deiin Dýbaida ótken alaman báigede «Kábirhan» deitin qazaq tulpary top jarǵany esińizde bolar. Osynaý jeńisti estigen el bórkin aspanǵa atyp qýanǵan. Al álemjelidegi jurt «Bolat Nazarbaev tiri bolsa, eki sózge kelmei tulpardy tartyp alar edi...» degen pikir bildirýde.
Bul tegin emes. Daýdyń basy Nazarbaevtyń inisine jylqy bermegeni úshin 14 jylǵa bas bostandyǵynan aiyrylǵan Esbol Jappasovta dep jazady Dalanews.kz.
Oqiǵa bylai órbigen: 2018 jyly Jambyl oblysy, Qordai aýdany, Beriktas aýylyndaǵy báigede qordailyq Esboldyń "Samal" atty sáigúligi máre syzyǵyn birinshi bolyp kesedi. Shabysty básekeniń nesibesine eki jeńil kólik berilgen.
Kópti eliktirgen tartýdan soń, Almaty oblysy Talǵar aýdanynyń sol kezdegi ákimi jeńisimen quttyqtap, aiǵyrǵa kóz salǵan Bolat Nazarbaevqa berýdi usynǵan. Biraq Esbol túbegeili bas tartqan. Keiin ákim qaita kelip, áńgimeni áriden órbitken. Ekeýara dialog ákimniń «Qaitarmasań, óziń kinálisiń!» degen ashýly sózimen aiaqtalǵan.
ACCA portalynyń aqparatyna qaraǵanda ýaqyt ozdyrmai Qordai aýylyna Ulttyq qaýipsizdik komitetiniń qyzmetkerleri kelip, jylqyshynyń ómirin zerdeleýge kirisken. Artynsha onyń qolastynda isteitin áieldiń balasy kezinde isti bolyp, basy daýǵa qalǵany osy oqiǵanyń ýshyǵýyna sebep bolǵan.
Óitkeni áiel ulyn bosatý úshin Jappasovtan 3 myń dollar qaryz alǵan. UQK qyzmetkerleri muny utymdy paidalanyp áieldi Jappasovtyń ústinen jala jabýǵa májbúrlegen. «Bas tartsańdar, para alý týraly is qozǵaimyz, ulyn túrmege jiberemiz» dep qorqytqan. Árine, áiel baýyr eti balasyn tańdaǵan...
Araǵa birneshe kún salyp, Jappasov is-tússiz joǵalyp ketken. Týystary eki apta izdegen. Keiin UQK qyzmetkeri habarlasyp, Jappasovtyń qaýipsiz úide ekenin, jaqyn arada bosatylatynyn aityp sendirgen.
Týystarynyń aitýynsha, ony shyǵaratyn kúni Jappasovtyń qurylysy bitpegen úiine pýlemet, kóligine UQK tárkilep qoiǵan tapansha jasyrylǵan. Osyny negizge alyp, Esbol Jappasovty túrmege qamaǵan.
Tergeý barysynda Esbol Jappasovtyń Qyrǵyzstan parlamentiniń depýtaty Damirbek Asylbekýlýmen birlesip Qytaidan Qazaqstan men Qyrǵyzstanǵa kontrabandalyq júk tasymaldaýmen ainalysatyn transulttyq uiymdasqan qylmystyq top qurǵany anyqtalypty-mys. Bul tuzdyq bolyp, 14 jylǵa bas bostandyǵynan aiyrylǵan. Izinshe Qordaiǵa belgisiz bireýler kelip, sáigúlikti tartyp almaq bolǵan. Biraq Jappasovtyń týystary bermegen.
Atyshýly oqiǵanyń jai-japsaryn osydan eki jyl buryn Almatyda ótken baspasóz máslihatynda Jappasovtyń týystary egjei-tegjeili aityp bergen edi.
«Esbol abaqtyda beker otyr. Onyń shyn sebebin bári biledi. Biraq únsiz otyr. Qańtar oqiǵasyna deiin biligin asyrǵan dókeidiń kórealmaýshylyǵy», – degen edi Esboldyń týysy Ádilhan Shyntasov.
Eń qyzyǵy sottalǵan Jappasovtyń aýyldastary sot sheshimine qarsylyq bildirmek bolǵan. Alaida UQK qyzmetkerleri iske qaita aralasyp, bastapqy sheshim saqtalypty. Bul iske belgili qazaqstandyq zańger jáne quqyq qorǵaýshy Aiman Omarova kirisken.
Jańa Qazaqstanda ádilettilik ornap, Esbol bostandyqqa shyqty ma? Dalanews oqiǵanyń mán-jaiyn anyqtaý ústinde.
