«Bolashaq» baǵdarlamasy ziiatker ulttyń kelbetin qalyptastyrdy
Damyǵan elderdiń jetekshi oqý oryndarynda bilim alǵan «bolashaqtyqtar» qazirgi tańda Elbasy Nursultan Nazarbaevtyń Qazaqstandy intellektýaldy ultqa ainaldyrý jolyndaǵy asyl armanyn júzege asyrýǵa bel býyp, bilek sybana kirisip ketti. Osy rette elimizdiń «Intellektýaldy ult» jobasyn daiyndap, iske asyrýda «Bolashaq» baǵdarlamasyn bitirip kelgen túlekterdiń alatyn orny erekshe. Osy mańyzdy jobany qolǵa alǵanda Ult kóshbasshysy Nursultan Nazarbaev osyǵan orai:
– Eń aldymen, biz «Bolashaq» baǵdarlamasynyń áleýetin paidalanýǵa tiispiz. Men bul saladaǵy taldaýdy muqiiat qarap shyqtym. Qazirgi kúni shetelde bilim alyp, elge kelgen ondaǵan myń «bolashaqtyqtar» bar. Taǵy da myńdaǵan jasymyz álemniń aldyńǵy qatarly oqý oryndarynda bilim alýda. Bul Qazaqstan úshin keremet adami áleýet bolyp tabylady. Biz aldaǵy ýaqytta osy múmkindigimizdi paidalanyp, elimizdi órkendetýimiz kerek, – dep Elbasy oiyn ortaǵa salǵan bolatyn.
Iá, qazirgi tańda «Bolashaq» baǵdarlamasy boiynsha bilim alǵan jastarymyz ǵylymi zertteýler isimen ainalysyp, elimizdiń abyroiyn asqaqtatyp júr. Osy baǵyttaǵy jumystardy jandandyra túsý úshin el Prezidenti Qasym-Jomart Toqaev ta jas ǵalymdardy qoldaý úshin memleket tarapynan arnaiy grant bólgenin bilemiz. Osylaisha, 2020-2022 jyldarǵa arnalǵan jas ǵalymdardyń ǵylymi zertteýlerin granttyq qarjylandyrýdyń jalpy kólemi 9 mlrd teńgeni qurady. Jyl saiyn 3 mlrd teńgeden bólinip otyrmaqshy.
Qazirgi kezde memlekettik ǵylymi-tehnikalyq jáne ekonomikalyq saraptamalar nátijesi boiynsha ulttyq ǵylymi keńester kelesi 7 basymdyqty baǵyt boiynsha jas ǵalymdardyń 1013 ótinimin iriktep alǵan.
Sonyń ishinde energetika jáne mashina jasaý salasynan – 102 ótinish, tabiǵi resýrstardy, onyń ishinde sý resýrstaryn, geologiiany, qaita óńdeýdi, jańa materialdar men tehnologiialardy, qaýipsiz buiymdar men konstrýktsiialardy utymdy paidalaný – 313 ótinish, jaratylystaný ǵylymdary salasyndaǵy ǵylymi zertteýler, aqparattyq, telekommýnikatsiialyq jáne ǵaryshtyq tehnologiialar boiynsha 167 joba iriktelgen. Sonymen qatar agroónerkásiptik keshendi turaqty damytý jáne aýyl sharýashylyǵy ónimderiniń qaýipsizdigi boiynsha – 139 joba, ómir jáne densaýlyq týraly ǵylym – 127, «Máńgilik el» ǵylymi negizderi (XXI ǵasyr bilimi, gýmanitarlyq ǵylymdar salasyndaǵy irgeli jáne qoldanbaly zertteýler –155, ulttyq qaýipsizdik jáne qorǵanys salasynda 10 ótinish túsken.
Memlekettiń grantyna ie bolǵan jas ǵalymdardyń kópshiligi «Bolashaq» baǵdarlamasy boiynsha shetelde bilim alyp, búginde elge oralyp, otandyq ǵylymnyń kóshin órge súirep júrgen jastar kóp. Qalai desek te, Elbasy Nursultan Nazarbaevtyń ziiatker ult qurý týrasyndaǵy asyl armany osylai elimizde iske asýda. Al onyń basynda «Bolashaq» baǵdarlamasynyń túlekteri júrgeni tipti qýantady. Osy bir tizbektelgen júie taiaý bolashaqta Qazaqstandy ziiatker ultqa ainaldyryp, elimizdi órkendete túspek.
