Bloomberg agenttiginiń jazýynsha, Shell, ExxonMobil, TotalEnergies jáne Eni kompaniialary úshin Qashaǵan jobasyndaǵy «Bolashaq» kesheninde kúkirttiń shamadan tys jinalýy kútpegen jaǵdai bolmaǵan. Qujattar konsortsiým NCOC basshylyǵy bul máseleni 2016 jyldan beri bilgenin kórsetedi, dep habarlaidy Dalanews.kz.
Agenttik deregine sáikes, 2017 jyly italiialyq Eni ishki prezentatsiiasynda óndiris kóleminiń artýyna bailanysty kúkirt limitteriniń asýy múmkin ekenin boljaǵan. Al 2019 jyly britandyq Shell kúkirttiń artyq kólemi úshin ár tonnasyna 3,5 myń dollarǵa deiin aiyppul salynýy múmkin ekenin tikelei eskertken.
«Ishki qujattar joba seriktesteriniń kúkirtti jedel satý nemese qosymsha saqtaý qoimalaryn salý shyǵyndaryn aiyppuldarmen salystyryp otyrǵanyn kórsetedi. Aqyr sońynda olar bul shyǵyndar jobanyń tabystylyǵyna qatty soqqy bolady degen sheshimge kelgen», - dep jazady Bloomberg.
Bloomberg sarapshylarynyń pikirinshe, «ekologiia esebinen únemdeý» strategiiasy túptep kelgende qarjylyq jáne quqyqtyq shyǵyndarǵa alyp kelgen. Bul shyǵyndar áleýetti tazartý nysandaryn salýǵa ketetin qarjymen salystyrǵanda birneshe ese joǵary bolyp shyqqan.
Agenttik mamandary bul jaǵdaidy batystyq korporatsiialar úshin jańa shyndyqtyń kórinisi dep baǵalaidy. Olardyń aitýynsha, damýshy ekonomikasy bar elderde ekologiialyq talaptar jahandyq kelisimsharttardy qaita qaraý kezinde qysym quralyna ainalyp keledi.
Qashaǵan jobasynyń investorlary úshin bul daý uzaq merzimdi repýtatsiialyq táýekelderge ákelip, ken ornyn igerýdiń kelesi kezeńderi boiynsha kelissózderdi edáýir kúrdelendirgen.
