BJZQ-nyń qarajatyna Otbasy banktiń qundy qaǵazdary satyp alyndy. 2025 jyldyń sáýir aiynda QR Ulttyq Bank basqarýyndaǵy zeinetaqy aktivteriniń portfeli 35 mlrd teńge bolatyn atalǵan banktiń qundy qaǵazdarymen tolyqty, onda da bul rette qarajat BJZQ-nyń ózinen alynǵan. Al osy mámile jasalǵanǵa deiin 1 sáýirdegi derekterge sáikes, portfelde nominaldy quny 50,5 mlrd teńge bolatyn "Otbasy banktiń" taǵy eki shyǵarylymyndaǵy obligatsiialar bolǵan. Sonda jańadan jasalǵan invetitsiialardy qosaqanda, portfeldegi mundai baǵaly qaǵazardyń nominaldy qun 1 mamyrǵa qarai 85,5 mlrd teńgege deiin jetti, al osy aidyń basyndaǵy aǵymdaǵy qun 92,4 mlrd teńgege baǵalandy, dep habarlaidy Dalanews.kz Data Hub-ke silteme jasap.
Sonda Otbasy bank qundy qaǵazdaryna jumsalǵan BJZQ qarajaty investitsiialyq portfeldiń jalpy kóleminiń shamamen 0,52%-na sai keledi eken.
Bul joly Otbasy bank zeinetaqy qarajaty esebinen shyǵarylǵan qundy qaǵazdardy sáýir aiynda qor birjasyna ornalastyrý kezinde jalpy somasy 50 mlrd teńge tarta aldy.
"Bank sol kezde KASE-de tartylǵan qarajat "Naýryz" baǵdarlamasy boiynsha nesielendirýge qajet ekenin basa aitqan. Jalpy, odan arǵy transhtar boiynsha baǵdarlamany qarjylandyrý úshin shamamen áli 200 mlrd teńge tabý josparlanýda", dep jazady Data Hub.
Demek, zeinetaqy aqshasy arqyly boiyna qan júgirgen Otbasy bank Úkimetke áli alaqan jaiýy múmkin.
Aita ketsek, buǵan deiin Májiliste Úkimetten memleketke qaitarylǵan aktivter qorynan halyqtyń osal toptaryna arnalǵan ipotekalyq nesielendirýge 50 mlrd teńge bólý suralǵan. Óitkeni 2025-2027 jyldarǵa arnalǵan respýblikalyq biýdjette osy topqa arnalǵan "2-10-20" baǵdarlamasy sheńberinde nesie (zaim) berý úshin qarajat kózdelmegen. Osyndai sipatta Úkimetke joldaǵan depýtattyq saýalynda Berik Beisenǵaliev atalǵan ipotekalyq baǵdarlama toqtap turǵanyn aitady.
"Qazirgi ýaqytta "2-10-20" baǵdarlamasy boiynsha jańa obektilerdi maquldaý protsesi toqtatylǵan. Bul jaǵdai, ásirese Otbasy bankke turǵyn úi saiasatyn reformalaý jónindegi zań aiasynda ulttyq damý institýty mártebesi berilip jatqan kezde, áleýmettik shielenis týdyrýy múmkin. Jalpy, "2-10-20" jeńildikti ipotekalyq baǵdarlamasyna qatysýshylarǵa Qazaqstan Respýblikasy Bas prokýratýrasynyń Aktivterdi qaitarý komiteti tartqan qarajat esebinen qaryz berý úshin "Otbasy bank" aktsionerlik qoǵamyn 50 mlrd teńge kóleminde qarjylandyrý múmkindigin qarastyrý usynyldy", - dedi ol.
Buǵan deiin saitymyzda "Memleketke qaryz "Nurbank" BJZQ-ǵa da qaryz bolyp shyqty, al QNRDA kimniń jaǵynda?" degen maqala jariialanǵan bolatyn.Sondai-aq bizden "BJZQ aktivteri osymen úshinshi ai qatarynan tabys ákelmeýde" degen materialdy da oqi alasyzdar.
