بجزق-نىڭ قاراجاتىنا وتباسى بانكتٸڭ قۇندى قاعازدارى ساتىپ الىندى. 2025 جىلدىڭ سەۋٸر ايىندا قر ۇلتتىق بانك باسقارۋىنداعى زەينەتاقى اكتيۆتەرٸنٸڭ پورتفەلٸ 35 ملرد تەڭگە بولاتىن اتالعان بانكتٸڭ قۇندى قاعازدارىمەن تولىقتى, وندا دا بۇل رەتتە قاراجات بجزق-نىڭ ٶزٸنەن الىنعان. ال وسى مەمٸلە جاسالعانعا دەيٸن 1 سەۋٸردەگٸ دەرەكتەرگە سەيكەس, پورتفەلدە نومينالدى قۇنى 50,5 ملرد تەڭگە بولاتىن "وتباسى بانكتٸڭ" تاعى ەكٸ شىعارىلىمىنداعى وبليگاتسييالار بولعان. سوندا جاڭادان جاسالعان ينۆەتيتسييالاردى قوساقاندا, پورتفەلدەگٸ مۇنداي باعالى قاعازاردىڭ نومينالدى قۇن 1 مامىرعا قاراي 85,5 ملرد تەڭگەگە دەيٸن جەتتٸ, ال وسى ايدىڭ باسىنداعى اعىمداعى قۇن 92,4 ملرد تەڭگەگە باعالاندى, دەپ حابارلايدى Dalanews.kz Data Hub-كە سٸلتەمە جاساپ.
سوندا وتباسى بانك قۇندى قاعازدارىنا جۇمسالعان بجزق قاراجاتى ينۆەستيتسييالىق پورتفەلدٸڭ جالپى كٶلەمٸنٸڭ شامامەن 0,52%-نا ساي كەلەدٸ ەكەن.
بۇل جولى وتباسى بانك زەينەتاقى قاراجاتى ەسەبٸنەن شىعارىلعان قۇندى قاعازداردى سەۋٸر ايىندا قور بيرجاسىنا ورنالاستىرۋ كەزٸندە جالپى سوماسى 50 ملرد تەڭگە تارتا الدى.
"بانك سول كەزدە KASE-دە تارتىلعان قاراجات "ناۋرىز" باعدارلاماسى بويىنشا نەسيەلەندٸرۋگە قاجەت ەكەنٸن باسا ايتقان. جالپى, ودان ارعى ترانشتار بويىنشا باعدارلامانى قارجىلاندىرۋ ٷشٸن شامامەن ەلٸ 200 ملرد تەڭگە تابۋ جوسپارلانۋدا", دەپ جازادى Data Hub.
دەمەك, زەينەتاقى اقشاسى ارقىلى بويىنا قان جٷگٸرگەن وتباسى بانك ٷكٸمەتكە ەلٸ الاقان جايۋى مٷمكٸن.
ايتا كەتسەك, بۇعان دەيٸن مەجٸلٸستە ٷكٸمەتتەن مەملەكەتكە قايتارىلعان اكتيۆتەر قورىنان حالىقتىڭ وسال توپتارىنا ارنالعان يپوتەكالىق نەسيەلەندٸرۋگە 50 ملرد تەڭگە بٶلۋ سۇرالعان. ٶيتكەنٸ 2025-2027 جىلدارعا ارنالعان رەسپۋبليكالىق بيۋدجەتتە وسى توپقا ارنالعان "2-10-20" باعدارلاماسى شەڭبەرٸندە نەسيە (زايم) بەرۋ ٷشٸن قاراجات كٶزدەلمەگەن. وسىنداي سيپاتتا ٷكٸمەتكە جولداعان دەپۋتاتتىق ساۋالىندا بەرٸك بەيسەنعاليەۆ اتالعان يپوتەكالىق باعدارلاما توقتاپ تۇرعانىن ايتادى.
"قازٸرگٸ ۋاقىتتا "2-10-20" باعدارلاماسى بويىنشا جاڭا وبەكتٸلەردٸ ماقۇلداۋ پروتسەسٸ توقتاتىلعان. بۇل جاعداي, ەسٸرەسە وتباسى بانككە تۇرعىن ٷي ساياساتىن رەفورمالاۋ جٶنٸندەگٸ زاڭ اياسىندا ۇلتتىق دامۋ ينستيتۋتى مەرتەبەسٸ بەرٸلٸپ جاتقان كەزدە, ەلەۋمەتتٸك شيەلەنٸس تۋدىرۋى مٷمكٸن. جالپى, "2-10-20" جەڭٸلدٸكتٸ يپوتەكالىق باعدارلاماسىنا قاتىسۋشىلارعا قازاقستان رەسپۋبليكاسى باس پروكۋراتۋراسىنىڭ اكتيۆتەردٸ قايتارۋ كوميتەتٸ تارتقان قاراجات ەسەبٸنەن قارىز بەرۋ ٷشٸن "وتباسى بانك" اكتسيونەرلٸك قوعامىن 50 ملرد تەڭگە كٶلەمٸندە قارجىلاندىرۋ مٷمكٸندٸگٸن قاراستىرۋ ۇسىنىلدى", - دەدٸ ول.
بۇعان دەيٸن سايتىمىزدا "مەملەكەتكە قارىز "نۇربانك" بجزق-عا دا قارىز بولىپ شىقتى, ال قنردا كٸمنٸڭ جاعىندا?" دەگەن ماقالا جارييالانعان بولاتىن.سونداي-اق بٸزدەن "بجزق اكتيۆتەرٸ وسىمەن ٷشٸنشٸ اي قاتارىنان تابىس ەكەلمەۋدە" دەگەن ماتەريالدى دا وقي الاسىزدار.
