Biryńǵai jinaqtaýshy zeinetaqy qorynyń málimetinshe, Qazaqstan aýmaǵynda eńbek sharty nemese azamattyq-quqyqtyq kelisimshart negizinde jumys istep júrgen EAEO-ǵa múshe memleketterdiń 105 029 azamaty úshin BJZQ-ǵa zeinetaqy jarnalary aýdarylǵan, dep habarlaidy Dalanews.kz.
Sonymen qatar BJZQ EAEO elderi azamattarynan túsken zeinetaqy tólemin taǵaiyndaý týraly 291 ótinishti oryndaǵan. Onyń ishinde 266 azamatqa Qazaqstan zańnamasyna sáikes zeinet jasyna tolýyna bailanysty zeinetaqy tólemi taǵaiyndalǵan. Al 25 muragerge jumys istegen azamattardyń qaitys bolýyna bailanysty tólem belgilengen.
Resei men Qyrǵyzstannyń zeinetaqymen qamsyzdandyrý organdary da bul baǵytta sheshim qabyldaǵan. Atalǵan elderdiń aýmaǵynda eńbek sharty negizinde jumys istep, sol jaqtyń zeinetaqy júiesine saqtandyrý jarnalaryn aýdarǵan 26 qazaqstandyqqa jasyna, káriligine nemese múgedektigine bailanysty ómir boiǵy zeinetaqy taǵaiyndalǵan. Budan bólek, Qazaqstannyń taǵy 4 azamatyna eki qazaqstandyqtyń qaitys bolýyna bailanysty asyraýshysynan aiyrylý boiynsha zeinetaqy belgilengen.
2021 jyldan bastap EAEO azamattary odaqqa múshe basqa elderde jumys istese, sol eldiń azamattarymen teń dárejede zeinetaqy quqyǵyn qalyptastyryp, saqtap, paidalana alady. Endi árbir EAEO eli 2021 jylǵy 1 qańtardan keiin óz aýmaǵynda jinaqtalǵan eńbek ótili úshin zeinetaqyny óz zańnamasyna sai tóleidi.
Eger azamattyń bir memlekettiń aýmaǵynda jinaǵan eńbek ótili zeinetaqy taǵaiyndaýǵa jetkiliksiz bolsa, onda EAEO-nyń basqa elderindegi eńbek ótili de eskeriledi. Bul rette eńbek ótiliniń ýaqyty bir-birimen qabattaspaýy kerek. Biraq EAEO elderiniń azamattary jumysqa ornalasqan memlekette eńbek qatynasyn mindetti túrde resmi rásimdeýi tiis.
Mysaly, Qazaqstan azamaty EAEO-ǵa múshe elderdiń birinde kelisim kúshine engennen keiin 3-5 jyl jumys istep, sol eldiń zeinetaqy talaptaryna sai kelse, onda sol memleket oǵan óz aýmaǵyndaǵy eńbek ótili úshin zeinetaqy taǵaiyndaidy. Mundai jaǵdaida qazaqstandyq azamat qujattaryn sol eldiń ýákiletti organyna nemese Qazaqstandaǵy ýákiletti organ retinde BJZQ-ǵa ótkize alady.
