Bul isti naýqanshyldyqqa ainaldyrǵanymyz sonshalyqty, taiaýda aýylǵa barǵanymda orta mektepti zorǵa bitirgen, myna dúniede qandai ózgeris bolyp jatsa da, qamsyz, muńsyz qalpynan ainymaityn dosym Álkembai:
– Sen joǵary jaqta júrsiń ǵoi (myna sózi unap qaldy). Jurt latynǵa kóshemiz dep dúrligip jatyr. Endi bárimiz aǵylshynsha sóileimiz be? Mektepte on jyl oqyp, orysshany qatyrmap edim. Endi jurttyń bári aǵylshynshaǵa aýysyp ketse, taǵy da sorlap qalaiyn dep turǵan siiaqtymyn ǵoi. Osy men biletin qazaqshaǵa qashan kóshemiz? – dep ýaiymyn aitqanda6 qarqyldap kúlip jiberdim. Dosyma:
– Qoryqpa, tilimiz sol "qazaq-orys" kúiinde qala beredi. Tek qana áripterimiz ózgeredi. Endi atyńdy Álkembai dep emes, "Alkembay" dep jazasyń, Bolǵan-bitkeni osy, – dep dosymnyń úreiin seiiltýge tyrystym. Biraq Álkembai dosym úshin bul reforma qiyn tietinin kirjigen qabaǵynan anyq baiqadym.
Iá, men de Qazaqstannyń latyn álipbiine kóshýin qoldaityn kóp qazaqstandyqtardyń (osylai aitsaq anyǵyraq bolar edi) birimin. Mundai reformany el bolyp qoldaýdyń máni zor ekenin de túsinemin. Biraq bizdiń halyqtyń saiasi belsendiligi mundai joǵary deńgeige kóterilgenin buryn-sońdy baiqamappyn.
Muǵalim, dáriger, politsiia, Assambleia múshesi, kásipker, traktorist, qoǵam belsendileri, bári-bári elimizdiń latyn álipbiine kóshýin qoldaityndaryn bildirip, gazet-jýrnal, áleýmettik jeli, saittarǵa kóldei-kóldei maqala jazyp jatyr. Osydan keiin qazaqstandyqtardyń teń jartysyn til mamany ma dep qaldym.
Biliktiń bastamasyn qoldaýda aldyna qara saldyrmaityn Myrzatai Joldasbekov aǵamyzdyń ózi "Latynǵa kóshýimiz kerek. Bul biraq qazaqtyń keshegi kóktemde jailaýǵa kóship, kúzde kiiz úiin jinap, qaita qystaýǵa kóshetindei nárse emes", – dep qalyń qoldaýshylardyń aptyǵyn basýǵa tyrysqanyn baiqaǵanymda tańqalǵanymdy jasyryp qaiteiin.
Ras, latyn álipbine kóshý elimiz úshin kerek. Tipti, bul iske halyqtyń qoldaýy aýadai qajet ekenin de túsinemin. Biraq latyn álipbiine kóshýdiń mańyzdylyǵy jaiynda muǵalimder men áskeri adamdarǵa maqala jazǵyzýdyń ne qajeti bar? Bul ispen mamandar ainalysýy kerek emes pe?
Nurlan Jumahan, bloger, jýrnalist
https://dalanews.kz/29038
