Bul video-úndeýlerde jastardyń baýyrlas eki halyq arasyndaǵy qantógisti qalamaityndary, Resei agressiiasyna qarsylyqtary ashyq aityldy jáne qatty synaldy. Reseilik stýdentter video-úndeýinde: «Biz jariialanbaǵan ári kóptegen otandastarymyz qatysyp jatqan qylmystyq soǵys úshin uialamyz. Biz Ýkrainanyń territoriialyq tutastyǵyn qurmetteý týraly bergen ýádesinen attap, Qyrym túbegin anneksiialap alǵan elimiz úshin uialamyz. Resei túrmelerinde Ýkraina azamattaryn zańsyz qamaýda ustap otyrǵany úshin uialamyz. Bizdi keshirińder», – dep keshirim de surady.
Jastar arasyndaǵy dialog ornatýǵa degen mundai talpynys qurmetteýge, úlgi alýǵa turarlyq azamattyq pozitsiia. Árine, álemdi Úshinshi dúniejúzilik soǵystyń úreiine malshyndyrǵan Resei men Ýkraina arasyndaǵy qaqtyǵys, qai eldiń bolsyn kári-jasyn alańdatatyn oqiǵa. Biraq, bárin kórip, bilip otyrǵan, orys tildi aýditoriiasynyń kólemi áli kúnge taryla qoimaǵan TMD-daǵy bizdiń memleket sekildi elderde turatyn jastardyń únsiz qalǵany kóńilge kirbeń uialatady. Osy máselege bailanysty belgili jýrnalist Qasym Amanjoluly: «Ýkrainalyq ta, reseilik te jastardyń video-úndeýlerin kórdim. Jaqsy forma. Zamanǵa sai jáne áserli. Al bizdiń jastarǵa kelsek... Bizdiń jastar saiasattan alys júr. Olarǵa Ýkrainanyń jerinen aiyrylǵanynan góri, Qairat Nurtastyń úilengen-úilenbegenin anyqtaý mańyzdy siiaqty. Bizdiń jastar bireýdiń súireýin, bireýdiń bastaýyn kútetin masyldyq kóńilge kóbirek beiim tárizdi. Ókinishke qarai...», – deidi. Elimizdegi naýqanshyl, kishkentai isti alaýlatyp-jalaýlatyp áketetin jastar uiymdary YouTube saityndaǵy video-úndeýge ún qospasa da, jekelegen azamattardyń basy birigip, ýkrainalyq jáne reseilik jastardyń arman-tilegine qoldaý bildirýge moraldyq qaqysy bar shyǵar. Múmkin, bizdegi jastar da Resei men Ýkraina arasyndaǵy qaishylyqqa «túsinistikpen» qarai ma eken?!..
Yrysbek DÁBEI
