بۇل ۆيدەو-ۇندەۋلەردە جاستاردىڭ باۋىرلاس ەكى حالىق اراسىنداعى قانتوگىستى قالامايتىندارى، رەسەي اگرەسسياسىنا قارسىلىقتارى اشىق ايتىلدى جانە قاتتى سىنالدى. رەسەيلىك ستۋدەنتتەر ۆيدەو-ۇندەۋىندە: «ءبىز جاريالانباعان ءارى كوپتەگەن وتانداستارىمىز قاتىسىپ جاتقان قىلمىستىق سوعىس ءۇشىن ۇيالامىز. ءبىز ۋكراينانىڭ تەرريتوريالىق تۇتاستىعىن قۇرمەتتەۋ تۋرالى بەرگەن ۋادەسىنەن اتتاپ، قىرىم تۇبەگىن اننەكسيالاپ العان ەلىمىز ءۇشىن ۇيالامىز. رەسەي تۇرمەلەرىندە ۋكراينا ازاماتتارىن زاڭسىز قاماۋدا ۇستاپ وتىرعانى ءۇشىن ۇيالامىز. ءبىزدى كەشىرىڭدەر»، – دەپ كەشىرىم دە سۇرادى.
جاستار اراسىنداعى ديالوگ ورناتۋعا دەگەن مۇنداي تالپىنىس قۇرمەتتەۋگە، ۇلگى الۋعا تۇرارلىق ازاماتتىق پوزيسيا. ارينە، الەمدى ءۇشىنشى دۇنيەجۇزىلىك سوعىستىڭ ۇرەيىنە مالشىندىرعان رەسەي مەن ۋكراينا اراسىنداعى قاقتىعىس، قاي ەلدىڭ بولسىن كارى-جاسىن الاڭداتاتىن وقيعا. ءبىراق، ءبارىن كورىپ، ءبىلىپ وتىرعان، ورىس ءتىلدى اۋديتورياسىنىڭ كولەمى ءالى كۇنگە تارىلا قويماعان تمد-داعى ءبىزدىڭ مەملەكەت سەكىلدى ەلدەردە تۇراتىن جاستاردىڭ ءۇنسىز قالعانى كوڭىلگە كىربەڭ ۇيالاتادى. وسى ماسەلەگە بايلانىستى بەلگىلى جۋرناليست قاسىم امانجول ۇلى: «ۋكراينالىق تا، رەسەيلىك تە جاستاردىڭ ۆيدەو-ۇندەۋلەرىن كوردىم. جاقسى فورما. زامانعا ساي جانە اسەرلى. ال ءبىزدىڭ جاستارعا كەلسەك... ءبىزدىڭ جاستار ساياساتتان الىس ءجۇر. ولارعا ۋكراينانىڭ جەرىنەن ايىرىلعانىنان گورى، قايرات نۇرتاستىڭ ۇيلەنگەن-ۇيلەنبەگەنىن انىقتاۋ ماڭىزدى سياقتى. ءبىزدىڭ جاستار بىرەۋدىڭ سۇيرەۋىن، بىرەۋدىڭ باستاۋىن كۇتەتىن ماسىلدىق كوڭىلگە كوبىرەك بەيىم ءتارىزدى. وكىنىشكە قاراي...»، – دەيدى. ەلىمىزدەگى ناۋقانشىل، كىشكەنتاي ءىستى الاۋلاتىپ-جالاۋلاتىپ اكەتەتىن جاستار ۇيىمدارى YouTube سايتىنداعى ۆيدەو-ۇندەۋگە ءۇن قوسپاسا دا، جەكەلەگەن ازاماتتاردىڭ باسى بىرىگىپ، ۋكراينالىق جانە رەسەيلىك جاستاردىڭ ارمان-تىلەگىنە قولداۋ بىلدىرۋگە مورالدىق قاقىسى بار شىعار. مۇمكىن، بىزدەگى جاستار دا رەسەي مەن ۋكراينا اراسىنداعى قايشىلىققا «تۇسىنىستىكپەن» قاراي ما ەكەن؟!..
ىرىسبەك دابەي
