Mádeniet jáne aqparat ministri Aida Balaeva Sara Nazarbaevanyń tóńiregindegi alypqashpa áńgimeler men qaýesetterge qatysty pikir bildirip, qoǵamda týyndaǵan kúmándi boljamdarǵa núkte qoiýǵa tyrysty, dep habarlaidy Dalanews.kz.
“Biz syrqatpen kúresip jatqan adamǵa tym qatigezdik tanyttyq. Ashyǵyn aitqanda, men de bul jaǵdaidyń búge-shigesin bilmeimin, óitkeni bul — jeke adamnyń, Tuńǵysh prezidenttiń otbasynyń jeke máselesi. Al biz onyń qaza tapqany jóninde habar taratyp jiberdik. Bul, menińshe, qatygezdik. Eger shynymen sondai jaǵdai oryn alsa, resmi túrde habarlanady. Nazarbaevtyń baspasóz hatshysy Aidos Úkibai marqum boldy degen aqparatty joqqa shyǵardy — bul durys sheshim boldy. Árqashan senimdi derekkózderge súiený kerek”, — dedi Balaeva.
Ministrge osyndai aqparattyq vakýýmnyń ne sebepti qalyptasqany, nege tiisti organdar únsiz otyrǵany jóninde de suraq qoiyldy. Buǵan qatysty Aida Balaeva qysqa ǵana jaýap berdi.
“Bul másele boiynsha biz de tolyqqandy aqparat ala almai otyrmyz”, – dedi ministr.
Aita keteiik, buǵan deiin áleýmettik jelide Nazarbaevtar ziratynda taǵy bir zirat paida bolǵany týraly aqparat tarady.
TikTok jelisinde taraǵan videoda avtor Bolat Nazarbaevtyń jubaiynyń, óziniń ziratyn kórsetip, jaqyn arada taǵy bir zirat paida bolǵanyn aitady.
Áleýmettik jeli qoldanýshylary bul jaǵdaidy túrlishe joryp jatyr. Keibir jeli qoldanýshylary muny Sara Nazarbaevaǵa qatysty jaǵdaimen de bailanystyrǵan.
Ákimdik jaýaby
Qarasai aýdany ákimdigi jelide tarap ketken videoǵa qatysty Tengrinews.kz basylymyna jaýap bergen.
Ákimdik málimetinshe, Nazarbaevtar áýletiniń Shamalǵan aýylyndaǵy ziratynda 2024 jyly jeltoqsanda qaitys bolǵan basqa adam jerlengen.
"Dini rásimder men dástúrlerge sai jerlendi. Qazir qabirde eshqandai jazý ne taqtaisha joq, alaida marqumnyń týystarynyń aitýynsha, jaqyn arada taqtaisha ornatylady", – dep jazylǵan ákimdik jaýabynda.
Buǵan deiingi jaǵdai
Aita keteiik, buǵan deiin Tuńǵysh Prezident Nursultan Nazarbaevtyń keńesshisi ári baspasóz hatshysy Aidos Úkibai BAQ-ta tarap jatqan aqparatqa pikir bildirip, Sara Nazarbaeva aman ekenin málimdedi.
