مادەنيەت جانە اقپارات ءمينيسترى ايدا بالايەۆا سارا نازاربايەۆانىڭ توڭىرەگىندەگى الىپقاشپا اڭگىمەلەر مەن قاۋەسەتتەرگە قاتىستى پىكىر ءبىلدىرىپ، قوعامدا تۋىنداعان كۇماندى بولجامدارعا نۇكتە قويۋعا تىرىستى، دەپ حابارلايدى Dalanews.kz.
“ءبىز سىرقاتپەن كۇرەسىپ جاتقان ادامعا تىم قاتىگەزدىك تانىتتىق. اشىعىن ايتقاندا، مەن دە بۇل جاعدايدىڭ بۇگە-شىگەسىن بىلمەيمىن، ويتكەنى بۇل — جەكە ادامنىڭ، تۇڭعىش پرەزيدەنتتىڭ وتباسىنىڭ جەكە ماسەلەسى. ال ءبىز ونىڭ قازا تاپقانى جونىندە حابار تاراتىپ جىبەردىك. بۇل، مەنىڭشە، قاتىگەزدىك. ەگەر شىنىمەن سونداي جاعداي ورىن السا، رەسمي تۇردە حابارلانادى. نازاربايەۆتىڭ باسپا ءسوز حاتشىسى ايدوس ۇكىباي مارقۇم بولدى دەگەن اقپاراتتى جوققا شىعاردى — بۇل دۇرىس شەشىم بولدى. ءارقاشان سەنىمدى دەرەككوزدەرگە سۇيەنۋ كەرەك”، — دەدى بالايەۆا.
مينيسترگە وسىنداي اقپاراتتىق ۆاكۋۋمنىڭ نە سەبەپتى قالىپتاسقانى، نەگە ءتيىستى ورگاندار ءۇنسىز وتىرعانى جونىندە دە سۇراق قويىلدى. بۇعان قاتىستى ايدا بالايەۆا قىسقا عانا جاۋاپ بەردى.
“بۇل ماسەلە بويىنشا ءبىز دە تولىققاندى اقپارات الا الماي وتىرمىز”، – دەدى مينيستر.
ايتا كەتەيىك، بۇعان دەيىن الەۋمەتتىك جەلىدە نازاربايەۆتار زيراتىندا تاعى ءبىر زيرات پايدا بولعانى تۋرالى اقپارات تارادى.
TikTok جەلىسىندە تاراعان ۆيدەودا اۆتور بولات نازاربايەۆتىڭ جۇبايىنىڭ، ءوزىنىڭ زيراتىن كورسەتىپ، جاقىن ارادا تاعى ءبىر زيرات پايدا بولعانىن ايتادى.
الەۋمەتتىك جەلى قولدانۋشىلارى بۇل جاعدايدى تۇرلىشە جورىپ جاتىر. كەيبىر جەلى قولدانۋشىلارى مۇنى سارا نازاربايەۆاعا قاتىستى جاعدايمەن دە بايلانىستىرعان.
اكىمدىك جاۋابى
قاراساي اۋدانى اكىمدىگى جەلىدە تاراپ كەتكەن ۆيدەوعا قاتىستى Tengrinews.kz باسىلىمىنا جاۋاپ بەرگەن.
اكىمدىك مالىمەتىنشە، نازاربايەۆتار اۋلەتىنىڭ شامالعان اۋىلىنداعى زيراتىندا 2024 جىلى جەلتوقساندا قايتىس بولعان باسقا ادام جەرلەنگەن.
"ءدىني راسىمدەر مەن داستۇرلەرگە ساي جەرلەندى. ءقازىر قابىردە ەشقانداي جازۋ نە تاقتايشا جوق، الايدا مارقۇمنىڭ تۋىستارىنىڭ ايتۋىنشا، جاقىن ارادا تاقتايشا ورناتىلادى"، – دەپ جازىلعان اكىمدىك جاۋابىندا.
بۇعان دەيىنگى جاعداي
ايتا كەتەيىك، بۇعان دەيىن تۇڭعىش پرەزيدەنت نۇرسۇلتان نازاربايەۆتىڭ كەڭەسشىسى ءارى باسپا ءسوز حاتشىسى ايدوس ۇكىباي باق-تا تاراپ جاتقان اقپاراتقا پىكىر ءبىلدىرىپ، سارا نازاربايەۆا امان ەكەنىن مالىمدەدى.
