"Orys tildi aýditoriiada “Chinovnik - slýga naroda” degen máteldi áleýmettik jelidegiler kóp aitatynyn baiqaimyn. Árine bul biz úshin jat uǵym. Sebebi qazaq dalasyndaǵy basqarý júiesi evropadan ózgeshe bolǵan. Alaida bizdiń ortaǵa sińip ketken mátel jaily óz oiymdy sizdermen bólisýdi jón sanadym.
20 jyldyq tájiribemniń barysynda ózime jáne áriptesterime qarata aitylatyn “seniń jalaqyńdy men tólep otyrmyn”, “maǵan mindettisiń”, “biz bolmasaq sen kimsiń” degen siiaqty sózderdi únemi estip kelemiz. Halyqtyń aitqany durys ta shyǵar, biraq ár nárse óz ornymen degendei…
Bylai qarasań qatardaǵy memqyzmetker degeniń - jaǵdaiy ortasha qońyrtóbel, qoǵamdaǵy problemalary da halyqpen ortaq adamdar ǵoi. Páterin ipotekaǵa alyp, kúnde jumysyna shapqylap, túnniń bir ýaǵyna deiin kabinette qamalyp, bala-shaǵasyn ósirip, salyǵyn tólep júrgen eńbekqor qarapaiym adam.
Biraq ol nege halyqqa jalshylyq deńgeiinde mindetti bolýy kerek.
Antikalyq dáýirde Sokrat aityp ketken “Slýga naroda” túsinigi qazirgi Qazaqstan qoǵamyna kele me? Ol kezdegi bailyǵy shalqyǵan aqsúiek taptyń sheneýnikteri halyqqa ózderin qaryz sezingendikten “slýga” bolǵysy kelgen shyǵar múmkin.
Qazirgi memlekettik qyzmettegi adam ol - siz ben biz. Memqyzmetker - mindeti men jaýapkershiligi jáne materialdyq jaǵdaiy halyqpen teń adam. Jurttan asyp ketken eshteńesi joq.
Osy oraida ózimniń áriptesterime, iaǵni memlekettik qyzmette mańdai terin tógip júrgen jerlesterime aitqym keletini:
Eshkimniń de jalshysy nemese anaý aitqandai “slýgasy” emessińder. Árqaisymyzdyń moinymyzǵa júktelgen óz mindetterimiz bar. Sony abroimen oryndaý, halyqtyń senimin aqtaý paryzymyz.
Basqa eshteńe emes. Eshkimge eshkim mindetti emes. Bárimiz bolashaq úshin, Qazaqstannyń bolashaǵy úshin jumys istep jatyrmyz", – dep jazdy Jaqsylyq Omar.
