Ózbek sheneýnikteri ózbek elinde ornatylǵan eskertkishte oryssha jazý joq dep "renjigen" Reseidiń syrtqy ister ministri Sergei Lavrovqa jaýap qatty, dep habarlaidy Dalanews.kz.
Sergei Lavrov Samarqandqa eki kúndik resmi saparmen barǵan bolatyn. Sapar barysynda Ózbekstan prezidenti Shavkat Mirziioevpen kezdesý jáne Bahtiior Saidovpen kelissózder ótkizý josparlanǵan.
23 sáýir kúni Reseidiń syrtqy ister ministri Sergei Lavrov Samarqandqa jasaǵan sapary barysynda «Qaiǵyly jamylǵan ana» memorialynyń janynda orys tilindegi jazýdyń bolmaýyna nazar aýdarǵan.
Eskertkishtiń eki jaǵynda jazýlar bar – biri ózbek tilinde, ekinshisi aǵylshyn tilinde. Resei SIM basshysy eskertkishte qaza tapqan jaýyngerlerge arnalǵan sózder tek aǵylshyn tiline aýdarylǵanyn aitty. Onda: «You are always in our heart, my dear» («Sen árqashan bizdiń júregimizdesiń, qymbattym») dep jazylǵan.
Foto: haqqin.az
– Sizderge aǵylshyndar qaidan kelip júr? Mynaý aǵylshyn tilinde jazylǵan eken, – dedi ol ekskýrsovodqa qarap.
– Munda barlyq tilde jazylǵan negizi. Bul – týristik qalasy ǵoi, – dep jaýap berdi ol.
– Orysshasyn kórip turǵan joqpyn, – dep jaýap qatty ministr.
Áńgime barysynda Ózbekstannyń syrtqy ister ministri Bahtiior Saidov ta qasynda boldy.
Kelissózder aiasynda taraptar ekijaqty qarym-qatynastardy damytý, Eýraziialyq integratsiia jáne Ekinshi dúniejúzilik soǵystaǵy Jeńistiń 80 jyldyǵyna daiyndyq máselelerin talqylaǵan bolatyn.
Keiinirek Ózbekstan prezidenti Shavkat Mirziioevpen jáne syrtqy ister ministri Bahtiior Saidovpen ótken kelissózderdiń qorytyndysy boiynsha ótken brifingte Sergei Lavrov Ózbekstanda «orys tiliniń pozitsiiasyn nyǵaitýǵa» baǵyttalǵan kúsh-jigerge qoldaý bildirdi.
Ol Ózbekstanda kúndelikti ómirde orys tilin belsendi qoldanatyn shamamen bir million otandastyń turatynyn atap ótti.
«Resei Ózbekstan basshylyǵynyń, atap aitqanda Shavkat Miromonuly Mirziioevtiń, ultaralyq úilesimdi saqtaý jáne orys tiliniń pozitsiiasyn nyǵaitý jolyndaǵy kúsh-jigerin únemi qoldaidy. Bul til Ózbekstanda ultaralyq qatynas tili retinde, sondai-aq reseilik mádeni jáne tarihi muranyń bir bólshegi retinde qyzmet etip keledi», – dedi Lavrov.
Ózbek sheneýnikteriniń jaýaby
Reseidiń syrtqy ister ministrine Ózbekstan Olii Májilisiniń Zań shyǵarý palatasynyń depýtaty Odiljon Tojiev jaýap berdi. Depýtat reseilik saiasatkerge qysqa, biraq nyq jaýap qaitardy.
"Ózbek halqy tildi mindet emes, múmkindik retinde tańdaidy. Shetel tilin jasandy túrde nasihattaý – súiispenshilik emes, kerisinshe, qarsylyq týdyrady. Eger Máskeýdiń basty alańynda ózbek tilinde jazý paida bolsa, onda bul týraly oilanýǵa bolady", – dep jazdy depýtat.
parliament.gov.uz
Sonymen qatar, «Millii tiklanish» partiiasynyń jetekshisi Alisher Qadyrov Resei syrtqy ister ministri Sergei Lavrovtyń Ózbekstandaǵy orys tiliniń mártebesine qatysty sózderine óz ustanymyn bildirdi.
«Reseilik saiasatkerler Ózbekstanda orys tili men mádenietine degen kózqarasty kez kelgen jolmen nasharlatýǵa tyrysyp jatyr. Nege bizdiń jastar eshkim májbúrlemese de aǵylshyn, nemis, túrik jáne arab tilderin úirenýge umtylady? Ministr Lavrov kúshpen talap etilgen qurmet pen jalǵan qajettilik keri áserge ákeletinin jaqsy túsinedi», – dep jazdy Qadyrov Telegram paraqshasynda.
podrobno.uz
Sergei Lavrovtyń sózine Jýrnalistika jáne buqaralyq kommýnikatsiia ýniversitetiniń rektory Sherzodhon Kýdrathoja da pikir bildirdi.
stv.uz
Ol ár eldiń eskertkishter men taqtaishalarda qai tilde jazý jazatynyn ózi sheshýge quqyly ekenin aitty.
«Bir memlekettiń ministri kelip, bizdiń ishki sheshimderimizdi synaýy – durys emes. Biz eshkimniń otary emespiz!» – dedi rektor.
