2026 jyldan bastap Qazaqstanda jeke tabys salyǵyna (JTS) progressivti shkala engiziledi. Jyldyq tabysy 36 mln teńgeden (aiyna shamamen 3 mln teńge) asatyn azamattar joǵary mólsherleme boiynsha salyq tóleidi, dep habarlaidy Dalanews.kz.
Bul týraly QR Qarjy ministrligi Memlekettik kirister komiteti tóraǵasynyń orynbasary Jánibek Nurjanov Ulttyq taldaý ortalyǵynda ótken brifingte málimdedi.
Onyń aitýynsha, azamattardyń basym bóligi úshin eleýli ózgeris bolmaidy. Negizgi jańashyldyq – JTS-tyń biryńǵai mólsherlemeden progressivti júiege kóshýi.
Jańa shkala qalai jumys isteidi?
Jyldyq tabys 36 mln teńgege deiin – 10% mólsherleme (ózgerissiz).
Jyldyq tabys 36 mln teńgeden assa – asqan bóligine 15% mólsherleme qoldanylady.
Birneshe jumys orny bolsa – qosymsha tólem qajet
Birneshe tabys kózi bar azamattarǵa erekshe nazar aýdarylady. Eger jiyntyq jyldyq tabys 36 mln teńgeden assa, salyq tóleýshi deklaratsiia tapsyryp, qosymsha 5% tóleýge mindetti:
Jumys berýshi burynǵydai 10% ustaidy.
Qalǵan 5%-dy azamat deklaratsiia arqyly ózi tóleidi.
Ózgerister kimderge áser etedi?
Jańa talaptar eń aldymen joǵary jalaqy alatyn qyzmetkerlerge jáne birneshe tabys kózinen kiris tabatyn azamattarǵa qatysty. Belgilengen shekten tómen tabys tabatyn jaldamaly qyzmetkerler úshin salyq júktemesi ózgerissiz qalady.
Nege progressivti salyq engiziledi?
Reformanyń maqsaty – «joǵary tabys – joǵary salyq» qaǵidatyn engizý, sonymen qatar qyzmetkerlerdiń negizgi bóligi úshin qoldanystaǵy mólsherlemeni saqtaý.
Eske salaiyq, jańa Salyq kodeksine sáikes, JTS-tyń progressivti shkalasy 2026 jyldan bastap kúshine enedi. Esepteýler boiynsha, 36–36,7 mln teńge shegi 8 500 AEK-ke sáikes keledi (2026 jylǵa boljanǵan AEK mólsheri boiynsha).
