Oblys ákimi Nurlybek Nálibaevtyń tóraǵalyǵymen Qyzylorda oblystyq Qazaqstan halqy Assambleiasynyń «Birlik pen kelisim jolyndaǵy 30 jyl» taqyrybyndaǵy HHVII sessiiasy ótti. Oǵan QR Parlamenti Májilisiniń depýtattary Qaraqat Abden, Murat Ábenov, Murat Ergeshbaev, oblystyq máslihat depýtattary, qala jáne aýdan ákimderi, oblystyq basqarma basshylary, saiasi partiia filialdarynyń jetekshileri, etnomádeni birlestikterdiń tóraǵalary, úkimettik emes uiymdar men oblystyq Assambleia qurylymdarynyń jetekshileri, buqaralyq aqparat quraldarynyń ókilderi, jastar qatysty,- dep habarlaidy Dalanews.kz
Aimaq basshysy Qazaqstan halqy Assambleiasynyń 30 jyldyǵyna orai óńirde qolǵa alynǵan jumystarǵa toqtaldy.
«Assambleianyń 30 jyldyǵyna «Qazatomprom» Ulttyq atom kompaniiasy» aktsionerlik qoǵamynyń qoldaýymen 3 mlrd. 800 mln. teńgege «Dostyq úiiniń» jańa ǵimaraty salynýda. Sáýletti ǵimarattyń irgetasyn ózderińizben birge 1 mamyr – Qazaqstan halqynyń birligi kúni qalaǵan bolatynbyz. Nysan qarasha aiynda el igiligine beriledi. Ózderińizge belgili, ótken 2024 jyldy óńirimizde «Rýhaniiat jyly» dep jariialap, mádeni-kópshilik sharalarmen birge kóptegen aýqymdy jobany júzege asyrdyq. Barlyq 7 aýdanda ishinde qoǵamdyq kelisim kabinetteri, neke qiiý zaly, kitaphana, mýzei, arhiv, jastar saraiy, ardagerler men analar úii bar «Rýhaniiat ortalyqtary» salyndy.
Bir murat, bir múdde jolynda tynymsyz eńbek etý – barshamyzdyń azamattyq mindetimiz. Dostyqty tý etken, jasampazdyq pen órleý jolyndaǵy aishyqty isterimiz kópke úlgi bola bergei! Birligimiz bekem, tirligimiz tolymdy bolsyn!», – dedi Nurlybek Mashbekuly.
Sessiiada etnosaralyq kelisimdi odan ári nyǵaitýdaǵy jumys baǵyty aiqyndaldy. Aimaq basshysy óńirdegi etnosaralyq jumys josparyn jan-jaqty taldap, onyń tiimdiligin arttyrý maqsatynda naqty usynystar ázirleýdi jáne keńes otyrystaryn júieli túrde ótkizýdi tapsyrdy. Sonymen birge, jańadan boi kóteretin «Dostyq úiin» týristik baǵyttarǵa qosyp, ony birlik pen yntymaqty nasihattaityn zamanaýi mádeni-ideologiialyq ortalyqqa ainaldyrý mindeti qoiyldy.
Jiynda QR Parlamenti Májilisiniń depýtaty Murat Ábenov, oblystyq Qazaqstan halqy Assambleiasy tóraǵasynyń qoǵamdyq negizdegi orynbasary Dilfýra Bairahtarova, «DaRALAce» shyǵarmashylyq úiiniń negizin qalaýshy, «Shapaǵat» medaliniń iegeri Svetlana Tsoi, oblystyq Qazaqstan halqy Assambleiasy janyndaǵy Jýrnalister men sarapshylar klýbynyń múshesi Ainur Tuńǵyshbaeva pikir bildirdi.
Assambleianyń 30 jyldyǵy aiasynda birqatar azamat Qazaqstan halqy Assambleiasynyń merekelik medalimen, QR Prezidenti Ákimshiligi Assambleia hatshylyǵynyń Alǵys hatymen, sondai-aq oblys ákiminiń Qurmet gramotasy jáne Alǵys hatymen marapattaldy.
