Almatydaǵy densaýlyq saqtaý uiymdarynyń basy daýǵa qaldy. 19 sáýirden bastap qaladaǵy 24 memlekettik aýrýhana men emhana bir apta ishinde Niý-Iork qalasyna saparǵa shyǵatyn bolǵan. Ár uiym bul issaparǵa 6 million teńgege deiin jumsaityny belgili boldy. Keibir mekemelerdiń shyǵyny sál tómen bolǵanymen, jalpy soma qomaqty, dep habarlaidy Dalanews.kz.
Bul týraly jelide Iýliia Blajnova jazdy.
Bul aqparat ashyq derekkózderde qoljetimdi. Aita keterligi, Almatynyń densaýlyq saqtaý uiymdary shetelge buǵan deiin de baryp júrgen. Biraq 2024 jyldan bastap saparlardyń quny eki esege qymbattaǵan. Sonymen qatar, tańdalǵan qalalar men issapar baǵdarlamalary kóp kúmán týdyrýda.
Máselen, 2024 jyldyń kúzinde Los-Andjeles qalasyna uiymdastyrylǵan sapardyń mazmuny men qundylyǵy qoǵamda rezonans týdyrǵan.
Eń soraqysy – mundai saparlar memlekettik satyp alý konkýrstaryn ótkizbei, árdaiym bir ǵana jetkizýshimen tikelei kelisimshart arqyly rásimdelip keledi.
Memlekettik satyp alýlar portalyndaǵy resmi aqparatqa sáikes, tek bir ǵana densaýlyq saqtaý uiymy 2024–2025 jyldary osy jetkizýshimen 166 mln 620 myń teńgege tikelei kelisimshart jasaǵan. Bul tek bir mekeme ǵana. Al jalpy kólemin kez kelgen adam portalda qarap, kóz jetkize alady, delingen habarlamada.
Saparlar kezinde árbir delegatsiiany Almaty qalalyq Densaýlyq saqtaý basqarmasynyń bir qyzmetkeri ilesip júredi. Bul derekti basqarmanyń ózi rastaǵan. Osyǵan bailanysty qoǵamda:
— Nege Densaýlyq saqtaý basqarmasy 2024 jyldan beri biýdjetti únemdeýdi toqtatty?
— Nege sapa men konkýrs talabyn elemeidi? degen suraqtar týyndaýda.
Britandyq Global Conferences kompaniiasy Almatyǵa London qalasyna arnalǵan biliktilikti arttyrý baǵdarlamalaryn usynyp kórgen. Onyń biri – uiym basshylaryna, ekinshisi – Ana men bala densaýlyǵy baǵytynda. Baǵasy – 2 mln 850 myń teńge. Alaida Densaýlyq saqtaý basqarmasy bul usynystardy qaramai, sol baiaǵy 6 milliondyq baǵdarlamalardy tańdaýdy jalǵastyrǵan.
Kompaniia bul týraly resmi saýal da joldaǵan. Alaida 10 kún ótse de, jaýap berilmegen.
