Qazaqstan Respýblikasy Premer-Ministriniń orynbasary Qanat Bozymbaevtyń tóraǵalyǵymen ótken Úkimettik komissiianyń otyrysynda birinshi kezektegi tergeý is-sharalarynyń nátijeleri jáne bolǵan oqiǵanyń barlyq sebepteri men mán-jailaryn anyqtaý jónindegi kezekti qadamdar qaraldy, dep habarlaidy dalanews.kz.
QR ishki ister ministriniń orynbasary Sanjar Ádilovtyń aitýynsha, qaza bolý faktisi boiynsha Qazaqstan Respýblikasy Qylmystyq kodeksiniń 453-babynyń 2-bóligi ("aýyr zardaptarǵa ákep soqqan qyzmetke salǵyrt qaraý") jáne 465-baby ("keme júrgizý qaǵidalaryn buzý") boiynsha qylmystyq ister qozǵalǵan.
"Tergeý barysynda áskeri qyzmetshilerdiń qaýipsizdigin qamtamasyz etýge, oqý-jattyǵýlardy uiymdastyrýǵa jáne qutqarý is-sharalaryn júrgizýge bailanysty zań buzýshylyqtarǵa jol berdi dep kúdikke ilingen laýazymdy tulǵalar anyqtaldy. Olardyń is – áreketterine quqyqtyq baǵa beriledi", - dedi Sanjar Ádilov.
Oqiǵadan keiin qutqarylǵan áskeri qyzmetshiniń jaǵdaiy týraly másele jeke qaraldy. Densaýlyq saqtaý vitse-ministri Manas Ramazanovtyń aitýynsha, áskeri qyzmetshiniń jaǵdaiy turaqty, ómirine qaýip tónip turǵan joq. Áskeri qyzmetshi esin jiyp, barlyq qajetti meditsinalyq kómekti alyp jatyr. Janynda ata-anasy bar.
Otyrys barysynda qaza tapqan jáne zardap shekken áskeri qyzmetshilerdiń otbasylaryna jan-jaqty qoldaý kórsetý jóninde naqty tapsyrmalar berildi. Atap aitqanda, barlyq túsken qarajatty bólýdiń absoliýtti ashyqtyǵyn qamtamasyz etiledi. Bul rette materialdyq kómek zańda belgilengen memlekettik tólemder men ótemaqylardy ǵana emes, sonymen qatar biznes ókilderi men metsenattar tarapynan qarjylyq qoldaýdy da qamtityn bolady.
Osy qarajatty shoǵyrlandyrý úshin arnaiy qor ashyldy. Qor qyzmetin Mańǵystaý oblysynyń ákimdigi turaqty baqylaýǵa aldy.
