Mańǵystaý oblysynda áskeri qyzmetshilerdiń qaza bolýyna bailanysty qylmystyq is boiynsha Qorǵanys ministrligi júiesindegi bes laýazymdy tulǵa ustaldy, dep habarlaidy dalanews.kz.
Ustalǵandardyń qatarynda Qazaqstan Qarýly kúshteri Áskeri-teńiz kúshteri Bas qolbasshysynyń birinshi orynbasary ári shtab bastyǵy, eki áskeri bólimniń komandiri, teńiz jaiaý áskerleri rotasynyń komandiri jáne «Qaisar» kateriniń komandiri bar.
Olar qyzmetke salǵyrt qaraý jáne aýyr zardaptarǵa ákep soqqan keme júrgizý qaǵidalaryn buzý boiynsha qylmystyq quqyq buzýshylyqtar jasady degen kúdikke ilingen.
Barlyǵy kúdikti dep tanylyp, Aqtaý qalasy Politsiia basqarmasynyń ýaqytsha ustaý izoliatoryna qamaldy.
«Hazar Qorǵany – 2026» oqý-jattyǵýy kezinde áskeri qyzmetshilerdiń qaza bolý faktisi boiynsha Ishki ister ministrliginiń áskeri-tergeý bólimshesi sotqa deiingi tergep-tekserý júrgizip jatyr.
Tergeý málimetinshe, 24 qyrkúiekte Aqtaý qalasynan 43 shaqyrym jerde Kaspii teńiziniń jaǵalaýynda oqý-jattyǵý barysynda «Qaisar» katerinen jeke quramdy túsirý kezinde qolaisyz meteorologiialyq jaǵdai qalyptasqan. Sonyń saldarynan teńiz aǵysy áskeri qyzmetshilerdi alyp ketken.
Tergeý barysynda oqý-jaýyngerlik tapsyrmany uiymdastyrý jáne oryndaý kezinde qabyldanǵan sheshimder, qaýipsizdik talaptarynyń saqtalýy, gidrometeorologiialyq jaǵdaidyń eskerilýi, katerdiń tehnikalyq jai-kúii jáne oqý-jattyǵýdy ótkizýge jaýapty laýazymdy tulǵalardyń áreketteri tekserilip jatyr.
Qajetti tergeý jáne protsestik is-sharalar júrgizilýde. Kúdikti tulǵalardyń áreketterine zańda belgilengen tártippen quqyqtyq baǵa beriledi.
Sotqa deiingi tergep-tekserý barysy Ishki ister ministrligi men Bas prokýratýranyń erekshe baqylaýynda.
Aita keteiik, Mańǵystaýdaǵy áskeri oqý-jattyǵý kezinde Kaspii teńizine 17 áskeri qyzmetshini aǵys alyp ketken. Úsheýi qutqarylyp, 14 áskeri qyzmetshi qaza tapty. Izdeý-qutqarý operatsiiasy aiaqtaldy.
Qazaqstanda osy qaiǵyly oqiǵaǵa bailanysty 25 qyrkúiek jalpyulttyq aza tutý kúni bolyp jariialandy.
