Óńir basshysyna oblystaǵy problemaly 10 avtomattandyrylǵan gaz taratý stansalarynyń búgingi jaǵdaiy baiandaldy. Olardyń biriniń qujaty tolyq aiaqtalmasa, endi birinde jóndeýden keiin aqaý shyqqan, taǵy birin qaita jańartý qajet. Olardyń basym bóligi Saryaǵash pen Keles aýdandarynda ornalasqan.
Ártúrli sebeptermen jyldar boiy iske qosylmai turǵan mańyzdy nysandardyń jai-kúiimen tanysqan aimaq basshysy osy ýaqytqa deiin olardyń qujaty men qurylysyn sozbalańǵa salǵan jaýaptylarǵa syn-eskertpe aityp, máseleni muqiiat qarastyrýdy mindettedi.
Atqaminerlerdiń sylbyr qimylyn synǵa alǵan ákim jaýaptylarǵa máseleni sheshýge bir ai ýaqyt berdi.
– Qaǵazbastylyqtan arylý kerek. Bir salada júrip, bir-birińizdi tanymaisyzdar. Turǵyndar gazsyz otyrǵanda, sizder syltaý aityp otyrsyzdar. Jaýapkershilik degen bolý kerek qoi. Qalaisha beiqam júre beresizder? Sózben emes, naqty ispen nátije kórsetińizder. Shuǵyl túrde qaraýsyz qalǵan nysandardy retke keltirip, halyqqa gaz berińizder, – dedi oblys ákimi Darhan Satybaldy.
Ár nysan iske qosylǵanda kemi 7 aýyl turǵyny tabiǵi gazben qamtylady. Oblys basshysy jaýapty sala jetekshilerine atalǵan máleleni qatań baqylaýǵa alýdy tapsyrdy.
