1 mamyr – Qazaqstan halqynyń birligi kúni qarsańynda Maqtaaral aýdanynda az qamtylǵan kópbalaly 50 otbasy baspanaly boldy. Aýdan ákimi Baqyt Asanov "Nurly Jer" baǵdarlamasy aıasynda satyp alynǵan jańa úılerdiń kiltterin turǵyndarǵa resmı túrde tabystady, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

– Buǵan deıin Myrzakent kentindegi jańadan boı kótergen móltek aýdannan kezekte turǵan 16 otbasyǵa úı berilgen edi. Mine, búgin az qamtylǵan kópbalaly otbasylardyń qýanyshyna ortaqtasyp otyrmyz. Biz aldaǵy ýaqytta Myrzakent kentinen kópqabatty turǵyn úılerdi salýǵa kirisemiz. Osylaısha, úı kezeginde turǵan maqtaaraldyqtardyń máselesin jyl saıyn sheship otyratyn bolamyz. Endeshe, jańa baspanalaryńyzda tek qana qýanysh, toılar bolsyn! – dedi Baqyt Nasyrhanuly.



Atalǵan jańa úıler A.Qalybekov aýyldyq okrýgi Tórtkúl aýylynda, J.Nurlybaev aýyldyq okrýgi Yrysty aýylynda, Eńbekshi aýyldyq okrýgi Shuǵyla aýylynda jáne Birlik aýyldyq okrýgine qarasty Q.Pernebaev aýyldarynda ornalasqan.

Jańa úılerdiń árbirinde kireberis dáliz, 3 jatyn bólmesi, 1 ashana jáne jýynatyn bólme (sanýzel) bar. Úıler tolyqtaı jylý júıesimen, salqyn jáne jyly sýmen qamtylǵan.

Aıta keteıik, aldaǵy ýaqytta Myrzakent kentin ulǵaıtýǵa arnalǵan jańa móltek aýdannan 5 qabatty 14 turǵyn úı, ıaǵnı 740 páter salyný josparlanýda.