Qazaqstanda jylý berý maýsymy josparǵa sáikes bastaldy, alaida Semei qalasynda jylý jelileriniń ýaqytynda daiyn bolmaýyna bailanysty jaýapty ákim orynbasaryn tártiptik jaýapkershilikke tartý tapsyryldy, dep habarlaidy dalanews.kz.
Bul másele Úkimet otyrysynda kún tártibinen tys qaraldy.
Premer-ministr Oljas Bektenov jylý kózderi men jelilerdiń daiyndyǵyn 1 qazanǵa deiin qamtamasyz etýdi tapsyrǵanyn aitty. Onyń málimetinshe, bir óńirden basqa barlyq aimaq tapsyrmany belgilengen merzimde oryndaǵan.
«Jylytý maýsymy josparǵa sáikes bastaldy. Ońtústik jáne batys óńirlerde jylý bekitilgen kestege jáne aýa raiy jaǵdaiyna bailanysty beriledi», – dedi Oljas Bektenov.
Semei qalasynda jylý jelileri ýaqytynda daiyn bolmaǵan. Osyǵan bailanysty Premer-ministr Abai oblysy ákiminiń osy salaǵa jetekshilik etetin orynbasaryn tártiptik jaýapkershilikke tartýdy tapsyrdy.
Qazir jylý 11 óńirde berile bastady. Almaty, Shymkent qalalary men Ulytaý, Jetisý, Almaty, Túrkistan, Jambyl, Batys Qazaqstan, Qyzylorda jáne Mańǵystaý oblystarynda jylý júiesine qosý jumystary qazan aiynyń sońyna deiin kestege jáne aýa raiyna sáikes júrgiziledi.
Premer-ministr óńir ákimderine jylý berý maýsymyn ótkizý jónindegi shtabtardyń jumysyn qaita jandandyryp, jylý kózderi men jelilerdiń jaǵdaiyn turaqty baqylaýdy tapsyrdy.
Sonymen qatar otynnyń normativtik qoryn jáne qosalqy jabdyqtardyń daiyndyǵyn qamtamasyz etý, halyqqa qajetti kómir baǵasyn baqylaýda ustaý jáne otyn tapshylyǵyna jol bermeý mindetteldi.
Premer-ministrdiń birinshi orynbasary Nurlybek Nálibaev barlyq jylý kózderinde otyn qory jasaqtalǵanyn, al jylý jáne elektr jelilerindegi jóndeý jumystary aiaqtalyp jatqanyn baiandady.
