Elordada bir kúnde tórt bala terezeden qulap ketti, olardyń ekeýi – qaza tapty. Ótken táýlikte 103 pýltine «bala qulady» degen sebeppen tórt túrli shaqyrý túsken. Balalar ártúrli biikten – 1-den 16-shy qabatqa deiin qulaǵan,- dep habarlaidy Dalanews.kz
10 jáne 16-qabattan qulaǵan balalar alǵan jaraqattarynan oqiǵa ornynda kóz jumdy. Onyń bireýi 3 jasta, ekinshisi 6 jasta bolǵan. Taǵy ekeýi oqiǵa ornynan jedel járdemmen balalar statsionaryna jetkizildi, olardyń denesinde kóptegen jaraqat bar. Qazirgi ýaqytta eki bala da jansaqtaý bóliminde jatyr. Dárigerler olardyń jaǵdaiyn aýyr dep baǵalap otyr.
«Ókinishke qarai, eresekterdiń salǵyrttyǵynyń saldarynan balalardyń densaýlyǵyna úlken ziian kelip qana qoimai, qaitys bolyp ta jatyr. Aýyr halde túsken balalardy kórgende: «Mundai jaǵdaiǵa eresekter qalai jol berdi? Nege bala qaraýsyz qaldy?» degen suraqtar týyndaidy. Ókinishke qarai, biikten qulaý faktileri jyldan-jylǵa kóbeiip keledi. Jyl basynan beri túrli biikten qulaǵan 51 bala bizge jetkizildi. Olardyń tórteýi alǵan jaraqatynan statsionarda qaitys boldy», – dep málimdedi №2 Kópbeiindi qalalyq balalar aýrýhanasynyń travmatolog-dárigerleri.
Dárigerlerdiń aitýynsha, kóbine oqiǵa sebebi anamnez barysynda anyqtalady: bala masaǵa arnalǵan torǵa súienip, terezeden qulap ketken.
«Masaǵa qarsy torǵa eshqashan senbeńizder. Olar qulaýdan qorǵaityn qural emes. Qurmetti ata-analar, balańyzdy bir sátke nazardan tys qaldyrý aýyr zardaptarǵa ákelýi múmkin», – dep eskertti Qoǵamdyq densaýlyq saqtaý basqarmasy.
Buǵan deiin basqarma 103 dispetcherine jasalǵan qońyraýdyń aýdiojazbasyn jariialaǵan bolatyn, onda turǵyndar úreimen balanyń qulaǵanyn aityp, jedel járdemdi shuǵyl shaqyrǵan.
Qalalyq densaýlyq saqtaý basqarmasynyń málimetinshe, jarty jyldyń ishinde 60 bala kópqabatty úidiń terezesinen qulap ketken. Olardyń toǵyzy jedel járdem kelgenshe kóz jumǵan.
