ەلوردادا ءبىر كۇندە ءتورت بالا تەرەزەدەن قۇلاپ كەتتى، ولاردىڭ ەكەۋى – قازا تاپتى. وتكەن تاۋلىكتە 103 پۋلتىنە «بالا قۇلادى» دەگەن سەبەپپەن ءتورت ءتۇرلى شاقىرۋ تۇسكەن. بالالار ءارتۇرلى بيىكتەن – 1-دەن 16-شى قاباتقا دەيىن قۇلاعان،- دەپ حابارلايدى Dalanews.kz
10 جانە 16-قاباتتان قۇلاعان بالالار العان جاراقاتتارىنان وقيعا ورنىندا كوز جۇمدى. ونىڭ بىرەۋى 3 جاستا، ەكىنشىسى 6 جاستا بولعان. تاعى ەكەۋى وقيعا ورنىنان جەدەل جاردەممەن بالالار ستاسيونارىنا جەتكىزىلدى، ولاردىڭ دەنەسىندە كوپتەگەن جاراقات بار. قازىرگى ۋاقىتتا ەكى بالا دا جانساقتاۋ بولىمىندە جاتىر. دارىگەرلەر ولاردىڭ جاعدايىن اۋىر دەپ باعالاپ وتىر.
«وكىنىشكە قاراي، ەرەسەكتەردىڭ سالعىرتتىعىنىڭ سالدارىنان بالالاردىڭ دەنساۋلىعىنا ۇلكەن زيان كەلىپ قانا قويماي، قايتىس بولىپ تا جاتىر. اۋىر حالدە تۇسكەن بالالاردى كورگەندە: «مۇنداي جاعدايعا ەرەسەكتەر قالاي جول بەردى؟ نەگە بالا قاراۋسىز قالدى؟» دەگەن سۇراقتار تۋىندايدى. وكىنىشكە قاراي، بيىكتەن قۇلاۋ فاكتىلەرى جىلدان-جىلعا كوبەيىپ كەلەدى. جىل باسىنان بەرى ءتۇرلى بيىكتەن قۇلاعان 51 بالا بىزگە جەتكىزىلدى. ولاردىڭ تورتەۋى العان جاراقاتىنان ستاسيوناردا قايتىس بولدى»، – دەپ مالىمدەدى №2 كوپبەيىندى قالالىق بالالار اۋرۋحاناسىنىڭ تراۆماتولوگ-دارىگەرلەرى.
دارىگەرلەردىڭ ايتۋىنشا، كوبىنە وقيعا سەبەبى انامنەز بارىسىندا انىقتالادى: بالا ماساعا ارنالعان تورعا سۇيەنىپ، تەرەزەدەن قۇلاپ كەتكەن.
«ماساعا قارسى تورعا ەشقاشان سەنبەڭىزدەر. ولار قۇلاۋدان قورعايتىن قۇرال ەمەس. قۇرمەتتى اتا-انالار، بالاڭىزدى ءبىر ساتكە نازاردان تىس قالدىرۋ اۋىر زارداپتارعا اكەلۋى مۇمكىن»، – دەپ ەسكەرتتى قوعامدىق دەنساۋلىق ساقتاۋ باسقارماسى.
بۇعان دەيىن باسقارما 103 ديسپەچەرىنە جاسالعان قوڭىراۋدىڭ اۋديوجازباسىن جاريالاعان بولاتىن، وندا تۇرعىندار ۇرەيمەن بالانىڭ قۇلاعانىن ايتىپ، جەدەل جاردەمدى شۇعىل شاقىرعان.
قالالىق دەنساۋلىق ساقتاۋ باسقارماسىنىڭ مالىمەتىنشە، جارتى جىلدىڭ ىشىندە 60 بالا كوپقاباتتى ءۇيدىڭ تەرەزەسىنەن قۇلاپ كەتكەن. ولاردىڭ توعىزى جەدەل جاردەم كەلگەنشە كوز جۇمعان.
