Qazaqstan qarjygerleri qaýymdastyǵynyń 2025 jylǵy naýryzdaǵy keıbir ındıkatorlarǵa qatysty qarjy naryǵynyń kásibı qatysýshylarynan alǵan kezekti saýalnamasynyń nátıjeleri jarıalandy. Sarapshylar teńge baǵamynyń turaqtylyǵyna qatysty oń pikir bildirip, kerisinshe munaı men bazalyq mólsherlemege qatysty jaǵdaı qıyn ekenin topshylaıdy, dep habarlaıdy Dalanews.kz.
Bul saýalnama qarjy naryǵynyń kásibı qatysýshylarynyń, bank, saqtandyrý, brokerlik uıymdar ókilderiniń, taldaý jáne qazynashylyq bólimsheleriniń qyzmetkerleriniń pikirin qamtıtynyn basa aıta ketelik.
Bazalyq mólsherleme men ınflásıa
Saýalnamaǵa qatysqan qarjy naryǵynyń sarapshylarynyń kópshiligi (69%) 7 naýryzda Ulttyq Bank otyrysynda bazalyq mólsherlemeniń aǵymdaǵy deńgeıi (15,25%) sol kúıinde qaldyrylady dep boljaıdy. Qalǵan respondentter (31%) ony ósedi dep sanaıdy.
"Mundaı boljamdar kóbinese turǵyn úı komýnaldy qyzmetteri men janar-jaǵarmaıǵa qatysty reformalar, búdjet shyǵystarynyń kóptigi, jalaqynyń ulǵaıýy, joǵary ınflásıalyq kútýlerdiń saqtalýy aıasynda aqpan aıynda elimizdegi baǵa ósiminiń qarqyn alýymen (bir aıda 1,5% jáne jylyna 9,4%) baılanysty týyndaýda. Sarapshylar ınflásıany bir jyldan keıin 10,3%-ǵa deıin údeıdi dep bajaılaıdy, bul monetarlyq retteýshiniń boljamynan edáýir joǵary kórsetkish (2025 jyly 6,5–8,5% jáne 2026 jyly 5,5–7,5%). Sonymen qatar, QR Ulttyq Bank naýryz aıyndaǵy otyrysynda bazalyq mólsherleme boıynsha sheshim qabyldaýda sheshýshi ról atqara alatyn jańartylǵan ekonomıkalyq boljamdardy da jarıalaıdy", delingen saýalnama qorytyndysynda.
Joǵary ınflásıalyq táýekelder aıasynda bir jyldan keıingi bazalyq mólsherleme boıynsha kútýler 14,75% - ǵa deıin (burynǵy boljam - 14,5% buryn) qaıta qaraldy.
1 AQSH dollary - 510,2 teńge
Aqpan aıynda ulttyq valúta baǵamynyń nyǵaıýy (3,7% - ǵa) jáne AQSH pen RF arasyndaǵy qatynastardyń qalypqa kele bastaıdy dep kútilgendikten teńge baǵamy boıynsha boljamdar aıtarlyqtaı jaqsardy.
Bir aıdan keıin 1 AQSH dollarynyń quny 510,2 teńge (buryn 513,9), al bir jyldan keıin 534,2 (burynǵy boljam - 551,2) teńge deńgeıinde bolady dep boljanady.
JİÓ jáne munaı baǵasy
Shıkizat óndirisiniń neǵurlym joǵary kólemi, eleýli búdjettik yntalandyrýlar, qurylymdyq reformalar jáne iri ınvestısıalyq, ınfraqurylymdyq jobalardy iske asyrý elimizdegi ekonomıkalyq ósimdi qoldaıdy. Bir jyldan keıin JİÓ ósimi (aqpan aıyndaǵy boljam - 4,1%) 4,3% bolady dep boljanady.
Sonymen qatar,Aq úıdiń saýda soǵysy, EO men QHR-dyń makroekonomıkalyq kórsetkishteriniń nasharlaýy, OPEK+ elderi shıkizattarynyń jahandyq tasymal kóleminiń boljamdy ósimi aıasynda bir jyldan keıin kútiletin Brent munaıynyń bir barreliniń quny 68,5 dollarǵa deıin (burynǵy boljam - 69,3) qaıta qaraldy (2025 jyldyń 1 sáýirinen bastap munaı óndirisiniń kólemi ulǵaıýy múmkin).
Buǵan deıin saıtymyzda "2025 jyldyń aıaǵynda elimizde ınflásıa 10%-dy quraıdy dep kútiledi - UEM" degen maqala jarıalanǵan bolatyn. Sondaı-aq 2025 jyly 3 naýryzda jarıalanǵan "Sarapshylar bıyl bazalyq mólsherleme kórsetkishi taǵy ósedi dep boljaıdy - Ulttyq Bank" degen materıaldy da bizdiń saıttan oqı alasyzdar. Halyk Finance aqpan aıynda ınflásıanyń kúrt údeý yqtımaldyǵyn eskere otyryp, monetarlyq retteýshi organ stavkany 25-50 b.p-ǵa kóteredi dep boljaıdy.
