Jetisý oblysynyń ákimi Beibit Isabaevtan memlekettik qyzmettegi "komandalyq aýysý" tájiribesi týraly surady, - dep habarlaidy Dalanews.kz.
"Siz Jetisý oblysyna jumysqa barǵan kezde Astanadan ózińizben birge basshylyq qyzmetterge qansha adam alyp keldińiz? Komandańyzdy ertip apardyńyz ba?" – dep jýrnalister OKQ brifinginde sheneýnikten surady.
Bul suraqqa jaýap bergen ákim Isabaev ózimen birge komanda alyp kelmegenin málimdedi.
"Men ózimmen birge bir adamdy – Senat depýtaty bolǵan kezimde birge jumys istegen kómekshimdi ǵana alyp keldim. Ol áli kúnge deiin meniń kómekshim bolyp jumys istep jatyr. Basqa eshkimdi alyp kelgen joqpyn. Barlyq basshylyqtaǵy kadrlar – bul Jetisý oblysynyń turǵyndary. Mysaly, meniń orynbasarym men apparat basshysy óz mansabyn Jetisý oblysynda bastaǵan, keiin Astana men Almatyǵa jumysqa ketken. Biraq meniń usynysymmen qaita óńirge oraldy", – dep málimdedi óńir basshysy.
Oblys ákimi ózine baǵynatyn barlyq qyzmetkerlerdiń, onyń ishinde aýdan ákimderiniń de jergilikti kadrlar ekenin qaitalap aitty.
"Menen basqa, Almaty oblysynda týǵan eshkim munda jumys istemeidi. Sondyqtan "komandalyq" aýysý týraly áńgimeler – bul ótkenniń sarqynshaǵy jáne mundai ádisterdi men eshqashan qoldanbaimyn", – dep qorytyndylady Isabaev.
