Bilikti – Baný dáriger
On jyldan beri atalmysh aýrýhanada qyzmet atqaryp júrgen keiipkerimiz S.Asfendiiarov atyndaǵy meditsina ýniversitetinde pediatriia mamandyǵy boiynsha bilim alyp, ony úzdik baǵamen támamdaǵan. Keiinnen anesteziologiia-reanimatologiia bólimi boiynsha mamandyq jetildirý kýrsynan ótip, Shý qalalyq aýrýhanasyna jumysqa ornalasqan. Óz mamandyǵyn maqtanysh emes, úlken jaýapkershilik dep sezinetin dáriger qashanda qarapaiymdylyǵynan tanǵan emes. Sonymen qatar, Baný Baqtybekqyzy aýrýhanada jumys istep júrip-aq, «Bolashaq» halyqaralyq stipendiialyq baǵdarlamasynyń stipendiaty atanǵan.
- Qalalyq aýrýhanada jumys istep júrgenimde aýrýhana janynan ekinshi deńgeili perinataldy ortalyq ashylady dep josparlanǵan bolatyn. Sebebi, aiaǵy aýyr áielderdiń densaýlyǵynda sál ǵana aýytqý baiqalǵan bolsa, ony aýdandyq aýrýhana emdei almaityn bolǵandyqtan, birden oblystyq perinataldy ortalyqqa jiberiletin. Aýdanda sol ortalyq ashylar bolsa, jańa týǵan náresteni kútip, onyń em-domyna jaýapty bilikti mamandardyń qajettiligi týyndaitynyn túsindim. Biliktiligimdi arttyrý maqsatynda ǵalamtor betterin aqtaryp otyryp, «Bolashaq» baǵdarlamasy týraly qulaqtandym. Sodan, birden qujattarymdy ázirleýge kiristim. Baǵyma orai Astana qalasyndaǵy emtihannan súrinbei ótip, baǵdarlamanyń stipendiaty atandym, - deidi ol.
Osylaisha, Gippokrat antyna berik Baný Baqtybekqyzy «Bolashaq» baǵdarlamasy boiynsha Korei respýblikasyna attanyp, jańa týǵan nárestelerdi kútý, emdeý baǵyttary boiynsha úsh ailyq ǵylymi-taǵylymdamadan ótken. Onyń aitýynsha, Korei elinde meditsina salasy óte joǵary deńgeide damyǵan. Bizdiń elde qolǵa alynyp otyrǵan mindetti áleýmettik meditsinalyq saqtandyrý júiesin olar ótken ǵasyrdyń ortasynda engizip qoiǵan eken. «Aýdanymyzda ashylady dep josparlanǵan perinataldy ortalyq sol boiy ashylmady. Al, jansaqtaý bóliminde jumys isteý psihologiialyq turǵydan óte aýyr. Ol asqan shydamdylyq pen yjdahattylyqty talap etedi. Dese de, shet elden alǵan bilimimdi jansaqtaý bóliminde júrip-aq kádege jaratýǵa bolatynyn túsindim», - deidi Baný.
Iia, aýrýdyń jasqa da, kárige de qaramastan, urymtal jerden soǵa beretini aqiqat. Osyndaida, qyl ústindegi adam taǵdyryn arashalaýshy aq halatty abzal jandar kómekke keledi. Sondyqtan da, osynaý abzal mamandyq iesi altyn qoldy dárigerler qaýymyna besiktegi baladan esiktegi qariiaǵa deiin aitar alǵysy sheksiz ekendigine shúbámiz joq.
