Jiyn barysynda sóz alǵan Aidyn Rahymbaev Almatyda kompaniia bólimshesin resmi túrde ashyp, qyzý jumysqa kirisip ketkenderin jýrnalister qaýymyna jetkizdi. Aidyn Rahymbaev kompaniianyń 2015 jyly atqarǵan jumystary jaiynda qysqasha baiandap berdi.
– 2015 jyl elimiz úshin aýyr jyl bolǵany daýsyz. Ǵalamdyq qarjy daǵdarysy kez kelgen salaǵa óz qiyndyqtaryn ala keldi. Biraq bizder Qazaqstandaǵy qurylys salasy boiynsha aiaǵyna nyq turǵan kompaniia bolǵandyqtan oiǵa alǵan josparlarymyzdy tolyqtai iske asyryp, kóptegen jumys atqardyq. Ótken jyly BI Group bir ǵana Astana qalasynda 5,7 myń páterdiń qurylys jumysyn aiaqtady. Bul 2015 jyly Elorda boiynsha paidalanýǵa berilgen páterlerdiń teń jartysy. Osylaisha 668 myń sharshy/metr bolatyn 23 turǵyn úi kesheniniń qurylys jumysyn aiaqtaǵanymyzdy maqtanyshpen aita alamyn. Kompaniia qurylǵan kúninen bastap Astanada 2,4 mln sharshy/metr bolatyn qurylys kesheniniń jumysyn aiaqtapty. Túsingen adamǵa bul – úlken sharýa. Endi osyndai qarqyndy jumysty Almaty qalasynda da jalǵastyrýdy kózdep otyrmyz. Qazirgi tańda kompaniiamyz Almatynyń qurylys naryǵyndaǵy úlesi 10 paiyzdy quraidy. Taiaý bolashaqta bul kórsetkishti 20-25 paiyzǵa deiin jetkizý oiymyzda bar, – dep Aidyn Jumadiluly bolashaq josparlarymen de bólisti.
Daǵdarys kezinde jańa múmkindikterdi ashyp, damý baǵytynan ainymaǵan komaniia bolashaqta Qazaqstannan syrt ózge elderde de iri nysandardy salýǵa bet buryp otyrǵanyn bildik. Bul jaiynda suraǵanymyzda kompaniia basshysy bylai dep jaýap qaiyrdy:
– Búginde bizder Qytai, Resei, Saýd Arabiiasy jáne Eýropanyń birqatar elderinde jumys isteý úshin daiyndyq jumystaryn júrgizip jatqan jaiymyz bar. Iá, BI Group-tyń qurylysshylary kez kelgen elde zamanaýi qurylys nysandaryn júrgizetin múmkindikke ie. Biraq halyqaralyq naryqqa shyǵý qurylys jumystaryn júrgizýmen ǵana shektelmeidi. Bizder ózge elderde jumys isteý úshin olardyń zańdaryn, ózindik erekshelikterin bilýge tiispiz. Kerek deseńiz, mundai jaǵdaida tildik barerdi de eńserýge týra keledi, – dedi.
Búginde BI Group kompaniiasy BI Group Development jáne BI Group Construction dep atalatyn eki holdingtan turatyny belgili. BI Group Development elimiz boiynsha jyljymaityn múlik qurylysyn júrgizýge mamandansa, BI Group Construction holdingi infraqurylymdar men iri óndiristik nysandar salýmen ainalysady. Kompaniia «Qorǵas – Shyǵys qaqpasy» erkin ekonomikalyq aimaǵyn, «Shalqar – Beineý» temir jol qurylysyn, «Balqash» JES-iniń qurylys jumystarymen ainalysýda. Budan basqa BI Group kompaniiasynyń qurylysshylary Altynkól stansasyn, «Batys Eýropa – Batys Qytai», «Astana – Pavlodar», «Astana – Kókshetaý» kúre joldaryn salǵanyn aita ketýimiz kerek.
Baspasóz máslihatynda kompaniia basshylary qurylys jumystaryna Qazaqstanda óndirilgen qurylys materialdaryn qoldanatyndaryn da aitty. Bul jaǵdai óz kezeginde kompaniianyń esep-qisap jumystaryn teńgemen júrgizýge múmkindik beripti. Qazaqstannyń qurylys salasynda biik belesti baǵyndyrǵan kompaniia aldaǵy ýaqytta osy baǵytynan ainymai, elimizdiń ósip-órkendeýine kúsh jumsaityndaryn alǵa tartty.
Nurlan Jumaqanov
