جيىن بارىسىندا ءسوز العان ايدىن راحىمبايەۆ الماتىدا كومپانيا بولىمشەسىن رەسمي تۇردە اشىپ، قىزۋ جۇمىسقا كىرىسىپ كەتكەندەرىن جۋرناليستەر قاۋىمىنا جەتكىزدى. ايدىن راحىمبايەۆ كومپانيانىڭ 2015 جىلى اتقارعان جۇمىستارى جايىندا قىسقاشا بايانداپ بەردى.
– 2015 جىل ەلىمىز ءۇشىن اۋىر جىل بولعانى داۋسىز. عالامدىق قارجى داعدارىسى كەز كەلگەن سالاعا ءوز قيىندىقتارىن الا كەلدى. ءبىراق بىزدەر قازاقستانداعى قۇرىلىس سالاسى بويىنشا اياعىنا نىق تۇرعان كومپانيا بولعاندىقتان ويعا العان جوسپارلارىمىزدى تولىقتاي ىسكە اسىرىپ، كوپتەگەن جۇمىس اتقاردىق. وتكەن جىلى BI Group ءبىر عانا استانا قالاسىندا 5،7 مىڭ پاتەردىڭ قۇرىلىس جۇمىسىن اياقتادى. بۇل 2015 جىلى ەلوردا بويىنشا پايدالانۋعا بەرىلگەن پاتەرلەردىڭ تەڭ جارتىسى. وسىلايشا 668 مىڭ شارشى/مەتر بولاتىن 23 تۇرعىن ءۇي كەشەنىنىڭ قۇرىلىس جۇمىسىن اياقتاعانىمىزدى ماقتانىشپەن ايتا الامىن. كومپانيا قۇرىلعان كۇنىنەن باستاپ استانادا 2،4 ملن شارشى/مەتر بولاتىن قۇرىلىس كەشەنىنىڭ جۇمىسىن اياقتاپتى. تۇسىنگەن ادامعا بۇل – ۇلكەن شارۋا. ەندى وسىنداي قارقىندى جۇمىستى الماتى قالاسىندا دا جالعاستىرۋدى كوزدەپ وتىرمىز. قازىرگى تاڭدا كومپانيامىز الماتىنىڭ قۇرىلىس نارىعىنداعى ۇلەسى 10 پايىزدى قۇرايدى. تاياۋ بولاشاقتا بۇل كورسەتكىشتى 20-25 پايىزعا دەيىن جەتكىزۋ ويىمىزدا بار، – دەپ ايدىن ءجۇمادىل ۇلى بولاشاق جوسپارلارىمەن دە ءبولىستى.
بۇگىندە قارجىلىق اينالىمى 262 ملرد تەڭگەنى قۇرايتىن كومانيا 250 Top Global Contractors رەيتينگىندە 164 ورىنعا تابان تىرەگەن قازاقستاندىق جالعىز كومپانيا ەكەنىن ايتا كەتۋىمىز كەرەك. BI Group 2015 جىلى قارقىندى دامۋ جولىنا تۇسكەن ۇزدىك كومپانيالاردىڭ اراسىندا 15 ورىنعا تابان تىرەگەن. سونداي-اق، قازاقستان پرەزيدەنتى نۇرسۇلتان نازاربايەۆ ۇيىمداستىرعان «التىن ساپا» سىيلىعىنا يە بولعانىن دا ايتا كەتۋىمىز كەرەك.
داعدارىس كەزىندە جاڭا مۇمكىندىكتەردى اشىپ، دامۋ باعىتىنان اينىماعان كومانيا بولاشاقتا قازاقستاننان سىرت وزگە ەلدەردە دە ءىرى نىسانداردى سالۋعا بەت بۇرىپ وتىرعانىن بىلدىك. بۇل جايىندا سۇراعانىمىزدا كومپانيا باسشىسى بىلاي دەپ جاۋاپ قايىردى:
– بۇگىندە بىزدەر جۇڭگو، رەسەي، ساۋد ارابياسى جانە ەۋروپانىڭ ءبىرقاتار ەلدەرىندە جۇمىس ىستەۋ ءۇشىن دايىندىق جۇمىستارىن جۇرگىزىپ جاتقان جايىمىز بار. ءيا، BI Group-تىڭ قۇرىلىسشىلارى كەز كەلگەن ەلدە زاماناۋي قۇرىلىس نىساندارىن جۇرگىزەتىن مۇمكىندىككە يە. ءبىراق حالىقارالىق نارىققا شىعۋ قۇرىلىس جۇمىستارىن جۇرگىزۋمەن عانا شەكتەلمەيدى. بىزدەر وزگە ەلدەردە جۇمىس ىستەۋ ءۇشىن ولاردىڭ زاڭدارىن، وزىندىك ەرەكشەلىكتەرىن بىلۋگە ءتيىسپىز. كەرەك دەسەڭىز، مۇنداي جاعدايدا تىلدىك بارەردى دە ەڭسەرۋگە تۋرا كەلەدى، – دەدى.
بۇگىندە BI Group كومپانياسى BI Group Development جانە BI Group Construction دەپ اتالاتىن ەكى حولدينگتان تۇراتىنى بەلگىلى. BI Group Development ەلىمىز بويىنشا جىلجىمايتىن مۇلىك قۇرىلىسىن جۇرگىزۋگە ماماندانسا، BI Group Construction حولدينگى ينفراقۇرىلىمدار مەن ءىرى وندىرىستىك نىساندار سالۋمەن اينالىسادى. كومپانيا «قورعاس – شىعىس قاقپاسى» ەركىن ەكونوميكالىق ايماعىن، «شالقار – بەينەۋ» تەمىر جول قۇرىلىسىن، «بالقاش» جەس-ىنىڭ قۇرىلىس جۇمىستارىمەن اينالىسۋدا. بۇدان باسقا BI Group كومپانياسىنىڭ قۇرىلىسشىلارى التىنكول ستانساسىن، «باتىس ەۋروپا – باتىس جۇڭگو»، «استانا – پاۆلودار»، «استانا – كوكشەتاۋ» كۇرە جولدارىن سالعانىن ايتا كەتۋىمىز كەرەك.
باسپا ءسوز ءماسليحاتىندا كومپانيا باسشىلارى قۇرىلىس جۇمىستارىنا قازاقستاندا وندىرىلگەن قۇرىلىس ماتەريالدارىن قولداناتىندارىن دا ايتتى. بۇل جاعداي ءوز كەزەگىندە كومپانيانىڭ ەسەپ-قيساپ جۇمىستارىن تەڭگەمەن جۇرگىزۋگە مۇمكىندىك بەرىپتى. قازاقستاننىڭ قۇرىلىس سالاسىندا بيىك بەلەستى باعىندىرعان كومپانيا الداعى ۋاقىتتا وسى باعىتىنان اينىماي، ەلىمىزدىڭ وسىپ-وركەندەۋىنە كۇش جۇمسايتىندارىن العا تارتتى.
نۇرلان جۇماقانوۆ
