Saltanatty jiynda «Nur Otan» partiiasy Túrkistan oblystyq filialy tóraǵasynyń birinshi orynbasary Beisenbai Tájibaev kópshilikti merekemen quttyqtady. Quttyqtaý sózinde ol Elbasy Nursultan Nazarbaevtyń Qazaqstandy damytý jolyndaǵy eńbekterine toqtaldy.
– QR Tuńǵysh Prezidenti kúniniń tutas elimiz úshin máni bar dep esepteimin. Sebebi, memleketimizdiń damýynda Elbasy Nursultan Nazarbaevtyń eńbegi zor. Men Elbasynyń shekarany tolyq shegendeý, elordany salý, iadrolyq qarýdan bas tartý, qazaq tiliniń mártebesin kóterý jáne Túrkistan oblysyn qurý týraly 5 eńbegin erekshe atap ótkim keledi.
Elbasymyzdyń Túrkistandy damytý, túrki áleminiń rýhani-mádeni ortalyǵyna ainaldyrý baǵytyndaǵy bastamasy tarihta qalatynyny anyq. Jýyrda partiia tóraǵasy, Elbasy partiiany jańǵyrtý, elge adal qyzmet etý, ózekti máselelerdi sheshýge atsalysý jóninde tapsyrma berdi. Ol úshin partiia músheleri shynaiy janashyrlyqpen jumys isteýi kerektigin aitty.
Osyǵan bailanysty jigerli, jalyndy, otanshyl azamattardy qabyldaýǵa basymdyq beriledi. Biyl partiiamen bailanysyn úzgen 3 myńnan astam adam partiia qatarynan shyǵarylyp, 2407 adam jańadan qabyldandy. Búgin qatarymyzǵa qosylǵan áriptesterimiz eldik máselede bizben birge jemisti jumys isteidi dep senemin, – degen B.Tájibaev partiia qataryna jańadan qabyldanǵan 20-ǵa jýyq azamatqa partiia biletterin tapsyrdy.
Olardyń arasynda kópbalaly analar, jastar, tanymal jýrnalister, ÚEU músheleri, kásipkerler, ustazdar, dárigerler jáne ózge de salanyń ókilderi bar. Túrkistannyń damýyna úles qosyp júrgen túrli sala ókilderi, tanymal adamdar da partbiletke ie boldy. Máselen, dańqty kókparshy, aýdaryspaq sportynyń sheberi, bilikti bapker Janysbek Saev ta resmi túrde partiiaǵa qabyldanyp, biletin aldy.
Bokstan álem chempionatynyń qola júldegeri, ulttyq qurama boksshysy Sáken Bibosynov ta biyl «Nur Otan» partiiasynyń sapyna qosyldy. Oqý-jattyǵý jiynynda júrgen órenge partiia bileti arnai ytapsyrylatyn bolady.
Sondai-aq osy kúni oblys kóleminde jańadan ashylǵan 10 bastaýysh partiia uiymy jetekshilerine de kýálikter tapsyryldy. Atap aitsaq, Túrkistan qalasynan 5, Saryaǵash aýdanynan 2 jáne Jetisai, Qazyǵurt, Ordabasy aýdandarynan da bastaýysh partiia uiymdary ashyldy.
Búginde oblysta «Nur Otan» partiiasynyń 88 myń múshe men 263 bastaýysh partiia uiymy bar. Mereke qarsańynda 1 myńnan astam adam partiia qataryna qabyldandy. Óńirde jańa kóshbasshylardy tabý, partiianyń jumysyn jandandyrý baǵytyndaǵy jumystar jalǵasyn tabady.
