Búgin Jetisý oblysynyń ákimi Beibit Isabaev Kerbulaq aýdanynyń aktivimen kezdesip, jýyrda sailanǵan jańa ákimdi tanystyrdy. Osy jiynda Kerbulaq aýdandyq sailaý komissiiasynyń tóraǵasy Kúláiza Shaqarova sailaýdyń qorytyndysyn málimdep, Janat Júnisbekovke aýdan ákiminiń kýáligin tapsyrdy, dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Aýdan ákimin tanystyrǵan óńir basshysy Janat Tólegenulynyń osy aýdannyń týmasy ekenin, ár jyldary Jetisý, Almaty oblystarynda túrli jaýapty qyzmetter atqarǵanyn atap ótti. Sońǵy jyldarda ol Kerbulaq aýdany ákiminiń orynbasary laýazymynda bolǵan.
- Osydan úsh jyl buryn Kerbulaq aýdanynda ondaǵan jyldar boiy júieli túrde sheshilmegen máseleler az emes bolatyn. Búgingi kúni solardyń eń ózektileri sheshildi. Budan bylai da óz tarapymyzdan aýdan damýyna qoldaý kórsetemiz. Eń bastysy, aýdannyń áleýmettik-ekonomikalyq damýyn qamtamasyz etip, halyqtyń ómir súrý deńgeiin kóterý, zań men tártipti qatań saqtaý. Ol úshin aýdan basshysy azamattardyń ózine artqan senimin aqtai otyryp, jergilikti halyqpen, qoǵamdyq uiymdarmen birlesip jumys isteýi kerek, - dedi oblys ákimi Beibit Isabaev.
Óz kezeginde J. Júnisbekov aldyna qoiylǵan mindetterdi laiyqty deńgeide oryndaýǵa bar bilimi men tájiribesin jumsaitynyn jetkizdi.
Eske salsaq, biylǵy 18 qańtarda Kerbulaq aýdany ákimin sailaý ótken bolatyn. Sailaýda 80,9% basym daýyspen Janat Tólegenuly Júnisbekov aýdan ákimi bolyp sailandy.
