بۇگىن جەتىسۋ وبلىسىنىڭ اكىمى بەيبىت يسابايەۆ كەربۇلاق اۋدانىنىڭ اكتيۆىمەن كەزدەسىپ، جۋىردا سايلانعان جاڭا اكىمدى تانىستىردى. وسى جيىندا كەربۇلاق اۋداندىق سايلاۋ كوميسسياسىنىڭ ءتوراعاسى كۇلايزا شاقاروۆا سايلاۋدىڭ قورىتىندىسىن مالىمدەپ، جانات جۇنىسبەكوۆكە اۋدان اكىمىنىڭ كۋالىگىن تاپسىردى، دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

اۋدان اكىمىن تانىستىرعان ءوڭىر باسشىسى جانات تولەگەن ۇلىنىڭ وسى اۋداننىڭ تۋماسى ەكەنىن، ءار جىلدارى جەتىسۋ، الماتى وبلىستارىندا ءتۇرلى جاۋاپتى قىزمەتتەر اتقارعانىن اتاپ ءوتتى. سوڭعى جىلداردا ول كەربۇلاق اۋدانى اكىمىنىڭ ورىنباسارى لاۋازىمىندا بولعان.

- وسىدان ءۇش جىل بۇرىن كەربۇلاق اۋدانىندا ونداعان جىلدار بويى جۇيەلى تۇردە شەشىلمەگەن ماسەلەلەر از ەمەس بولاتىن. بۇگىنگى كۇنى سولاردىڭ ەڭ وزەكتىلەرى شەشىلدى. بۇدان بىلاي دا ءوز تاراپىمىزدان اۋدان دامۋىنا قولداۋ كورسەتەمىز. ەڭ باستىسى، اۋداننىڭ الەۋمەتتىك-ەكونوميكالىق دامۋىن قامتاماسىز ەتىپ، حالىقتىڭ ءومىر ءسۇرۋ دەڭگەيىن كوتەرۋ، زاڭ مەن ءتارتىپتى قاتاڭ ساقتاۋ. ول ءۇشىن اۋدان باسشىسى ازاماتتاردىڭ وزىنە ارتقان سەنىمىن اقتاي وتىرىپ، جەرگىلىكتى حالىقپەن، قوعامدىق ۇيىمدارمەن بىرلەسىپ جۇمىس ىستەۋى كەرەك، - دەدى وبلىس اكىمى بەيبىت يسابايەۆ.

ءوز كەزەگىندە ج. جۇنىسبەكوۆ الدىنا قويىلعان مىندەتتەردى لايىقتى دەڭگەيدە ورىنداۋعا بار ءبىلىمى مەن تاجىريبەسىن جۇمسايتىنىن جەتكىزدى.

ەسكە سالساق، بيىلعى 18 قاڭتاردا كەربۇلاق اۋدانى اكىمىن سايلاۋ وتكەن بولاتىن. سايلاۋدا 80،9% باسىم داۋىسپەن جانات تولەگەن ۇلى جۇنىسبەكوۆ اۋدان اكىمى بولىپ سايلاندى.