Búgin Taldyqorǵan qalasyndaǵy B.Rımova atyndaǵy drama teatrynda 8 naýryz merekesine oraı Jetisý oblysynyń ákimi Beıbit Isabaev jetisýlyq áıelder qaýymyn quttyqtady. Merekelik sharaǵa 500 adam shaqyryldy, – dep habarlaıdy Dalanews.kz Jetisý oblysy ákiminiń baspasóz qyzmetine silteme jasap.
Saltanatty jıynda óńirdiń ár aýdan-qalalarynan kelgen, túrli salalarda jemisti eńbek etip júrgen qarapaıym eńbek adamdary marapattaldy.
Beıbit Isabaev óziniń quttyqtaý sózinde áıel-analardyń qoǵamdaǵy róline toqtalyp, merekelik jyly lebizin jetkizdi:
– Áıel-ananyń aqyl-parasaty, oı órisi, ishki sıpaty, rýhanı qýaty, adamgershilik bolmysy qashanda qoǵamdy alǵa jeteleıtin aıryqsha kúsh. Ana – tirshiliktiń bastaýy. Meıirimniń qaınar kózi. Shańyraqtyń shamshyraǵy.
Haýa anadan bastalǵan otbasylyq qundylyqtar, urpaqtar sabaqtastyǵy, rýhanı-adamgershilik joly búginge deıin úzdiksiz jalǵasyp, memleket múddesine, el bolashaǵyna qyzmet etip keledi. Sondyqtan búgingi jańarǵan, ádiletti, ashyq qoǵam qurýdaǵy ıgi bastamalardyń basty qoldaýshysy ózderińiz ekenin rızashylyqpen aıtamyz, – degen Beıbit Isabaev memleket qoldaýymen jeke isin bastap, tabysty eńbek etip kele jatqan analardyń kópke úlgi tájirıbesin atap ótti.
Mysaly, aýyldyq jerlerdegi kásipkerlikti damytýǵa baǵyttalǵan «Aýyl amanaty» jobasynda oblys boıynsha ótken jyly qoldaý tapqan 533 jobanyń 44%-y áıelderge tıesili eken.
Solardyń qatarynda aqsýlyq Qarlyǵash Tumarbaı, Panfılov aýdanynan Mınýra Qasymjanqyzy tigin sehyn ashyp, ulttyq stıldegi ónimder tigýdi qolǵa aldy. Mal ósirýdiń aýyrtpalyǵyna qaramastan, taldyqorǵandyq Gúlzıra Táýirbek osy baǵdarlamamen usaq mal satyp alyp, jeke sharýasyn tabysty júrgizip otyr. Sol sıaqty bilim berý, densaýlyq saqtaý, áleýmettik qorǵaý salalarynda da eńbeginiń jemisin kórip júrgen úzdik mamandar atap ótildi.
– Ardaqty analar! Qurmetti arýlar! Barshańyzǵa myqty densaýlyq, tolaıym tabys, qýanysh pen shattyq tileımin. Árdaıym ásemdik pen ádemiliktiń, jylylyq pen meıirimniń jarshysy bolyp, baqytty ǵumyr keshińizder. Otbasylaryńyzǵa bereke, elimizge amandyq bersin! Mereke qutty bolsyn! – degen Beıbit Isabaev Eńbek Eri Kúlásh Aıtjanovaǵa, Qazaqstannyń Halyq ártisi Almahan Kenjebekovaǵa, «Qamqor» arnaýly qyzmetterge muqtaj balalardy qoldaý ortalyǵynyń dırektory Merýert Jıenbekovaǵa, Qazaqstannyń 20 mıllıonynshy sábıiniń anasy Dıana Ázimbaevaǵa jáne Jetisý oblysynyń Qoǵamdyq keńesiniń múshesi Rýfına Ýsanovaǵa Memleket basshysynyń quttyqtaý hatyn tapsyrdy.
Sol sıaqty on kóp balaly anaǵa "Altyn alqa", "Kúmis alqa", taǵy jıyrmaǵa jýyq názik janǵa oblys ákiminiń Alǵys hatyn tapsyrdy. Alǵys hat alǵandardyń barlyǵy atap aıtqanda, aýyl sharýashylyǵy, temir jol, poshta, energetıka, densaýlyq sıaqty mańyzdy salalarda uzaq jylǵy tájirıbesi bar hat tasýshy, qyzylshashy, tazalyqshy, aspaz, ınjener tehnolog t.b qarapaıym eńbek adamdary.
Mereke konserttik baǵdarlamamen jalǵasty.