Búgin Taldyqorǵan qalasyndaǵy B.Rimova atyndaǵy drama teatrynda 8 naýryz merekesine orai Jetisý oblysynyń ákimi Beibit Isabaev jetisýlyq áielder qaýymyn quttyqtady. Merekelik sharaǵa 500 adam shaqyryldy, – dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Saltanatty jiynda óńirdiń ár aýdan-qalalarynan kelgen, túrli salalarda jemisti eńbek etip júrgen qarapaiym eńbek adamdary marapattaldy.
Beibit Isabaev óziniń quttyqtaý sózinde áiel-analardyń qoǵamdaǵy róline toqtalyp, merekelik jyly lebizin jetkizdi:
– Áiel-ananyń aqyl-parasaty, oi órisi, ishki sipaty, rýhani qýaty, adamgershilik bolmysy qashanda qoǵamdy alǵa jeteleitin airyqsha kúsh. Ana – tirshiliktiń bastaýy. Meiirimniń qainar kózi. Shańyraqtyń shamshyraǵy.
Mysaly, aýyldyq jerlerdegi kásipkerlikti damytýǵa baǵyttalǵan «Aýyl amanaty» jobasynda oblys boiynsha ótken jyly qoldaý tapqan 533 jobanyń 44%-y áielderge tiesili eken.
Solardyń qatarynda aqsýlyq Qarlyǵash Tumarbai, Panfilov aýdanynan Minýra Qasymjanqyzy tigin tsehyn ashyp, ulttyq stildegi ónimder tigýdi qolǵa aldy. Mal ósirýdiń aýyrtpalyǵyna qaramastan, taldyqorǵandyq Gúlzira Táýirbek osy baǵdarlamamen usaq mal satyp alyp, jeke sharýasyn tabysty júrgizip otyr. Sol siiaqty bilim berý, densaýlyq saqtaý, áleýmettik qorǵaý salalarynda da eńbeginiń jemisin kórip júrgen úzdik mamandar atap ótildi.
– Ardaqty analar! Qurmetti arýlar! Barshańyzǵa myqty densaýlyq, tolaiym tabys, qýanysh pen shattyq tileimin. Árdaiym ásemdik pen ádemiliktiń, jylylyq pen meiirimniń jarshysy bolyp, baqytty ǵumyr keshińizder. Otbasylaryńyzǵa bereke, elimizge amandyq bersin! Mereke qutty bolsyn! – degen Beibit Isabaev Eńbek Eri Kúlásh Aitjanovaǵa, Qazaqstannyń Halyq ártisi Almahan Kenjebekovaǵa, «Qamqor» arnaýly qyzmetterge muqtaj balalardy qoldaý ortalyǵynyń direktory Merýert Jienbekovaǵa, Qazaqstannyń 20 millionynshy sábiiniń anasy Diana Ázimbaevaǵa jáne Jetisý oblysynyń Qoǵamdyq keńesiniń múshesi Rýfina Ýsanovaǵa Memleket basshysynyń quttyqtaý hatyn tapsyrdy.
Mereke kontserttik baǵdarlamamen jalǵasty.
