4 sáýir kúni tústen keiin Besqaraǵai aýdanyna qarasty Qoianbai aýyly mańynda qurǵaq shóp órtengeni týraly aqparat túsken bolatyn. Jeldiń ekpinimen órt “Semei ormany” tabiǵi rezervatynyń Morozov filialy aýmaǵyna taralǵan, – dep habarlaidy Dalanews.kz Abai oblysy ákiminiń baspasóz qyzmetine silteme jasap.
Oqiǵa ornyna dereý órt sóndirý bólimderi, arnaiy tehnika men orman sharýashylyǵy qyzmetkerleri jumyldyryldy.
Órt sóndirýge Abai, Shyǵys Qazaqstan jáne Pavlodar oblystarynyń Tótenshe jaǵdailar departamentteri, «Semei ormany» men «Ertis ormany» mekemeleriniń qyzmetkerleri jáne jergilikti atqarýshy organdar atsalysyp jatyr.
Jaǵdaidy baqylaý úshin oqiǵa ornyna Abai oblysynyń ákimi Berik Ýáli baryp, jedel shtab otyrysyn ótkizdi. TJD bastyǵy Manarbek Shapaǵatov pen oblys ákiminiń orynbasary Dimitrii Garikov óńir basshysyna ahýal jaily baiandady.
Órtti sóndirýge barlyǵy 353 adam, 130-ǵa jýyq tehnika jáne 1 tikushaq tartyldy. Qazirgi ýaqytta órttiń taralýy toqtaǵan, jaǵdai turaqtanyp keledi. Mamandardyń aitýynsha, jańbyrly aýa raiy órtti sóndirýge qolaily jaǵdai týǵyzǵan.
ShQO ákimi órt tolyq sóndirilgenge deiin jaǵdai qatań baqylaýda bolatynyn aityp, tiisti tapsyrmalar berdi.
– Eń bastysy – adamdardyń ómiri men qaýipsizdigi. Barlyq tehnika men múmkindikter jumyldyrylýy tiis. Qazir Óskemen men Pavlodardan kómek kele jatyr. Tańerteń tikushaqpen órt bolǵan aýmaqty sholyp shyǵamyn. Jaǵdai tikelei baqylaýymda bolady, – dedi Berik Ýáli.
Qazirgi ýaqytta eń bastysy, eldi mekenderge qaýip tónip turǵan joq. Aimaqtaǵy ahýal tolyq qadaǵalanyp otyr.
