4 ءساۋىر كۇنى تۇستەن كەيىن بەسقاراعاي اۋدانىنا قاراستى قويانباي اۋىلى ماڭىندا قۇرعاق ءشوپ ورتەنگەنى تۋرالى اقپارات تۇسكەن بولاتىن. جەلدىڭ ەكپىنىمەن ءورت “سەمەي ورمانى” تابيعي رەزەرۆاتىنىڭ موروزوۆ فيليالى اۋماعىنا تارالعان، – دەپ حابارلايدى Dalanews.kz اباي وبلىسى اكىمىنىڭ باسپا ءسوز قىزمەتىنە سىلتەمە جاساپ.
وقيعا ورنىنا دەرەۋ ءورت ءسوندىرۋ بولىمدەرى، ارنايى تەحنيكا مەن ورمان شارۋاشىلىعى قىزمەتكەرلەرى جۇمىلدىرىلدى.
ءورت سوندىرۋگە اباي، شىعىس قازاقستان جانە پاۆلودار وبلىستارىنىڭ توتەنشە جاعدايلار دەپارتامەنتتەرى، «سەمەي ورمانى» مەن «ەرتىس ورمانى» مەكەمەلەرىنىڭ قىزمەتكەرلەرى جانە جەرگىلىكتى اتقارۋشى ورگاندار اتسالىسىپ جاتىر.
جاعدايدى باقىلاۋ ءۇشىن وقيعا ورنىنا اباي وبلىسىنىڭ اكىمى بەرىك ءۋالي بارىپ، جەدەل شتاب وتىرىسىن وتكىزدى. تجد باستىعى ماناربەك شاپاعاتوۆ پەن وبلىس اكىمىنىڭ ورىنباسارى ديميتريي گاريكوۆ ءوڭىر باسشىسىنا احۋال جايلى باياندادى.
ءورتتى سوندىرۋگە بارلىعى 353 ادام، 130-عا جۋىق تەحنيكا جانە 1 تىكۇشاق تارتىلدى. قازىرگى ۋاقىتتا ءورتتىڭ تارالۋى توقتاعان، جاعداي تۇراقتانىپ كەلەدى. مامانداردىڭ ايتۋىنشا، جاڭبىرلى اۋا رايى ءورتتى سوندىرۋگە قولايلى جاعداي تۋعىزعان.
شقو اكىمى ءورت تولىق سوندىرىلگەنگە دەيىن جاعداي قاتاڭ باقىلاۋدا بولاتىنىن ايتىپ، ءتيىستى تاپسىرمالار بەردى.
– ەڭ باستىسى – ادامداردىڭ ءومىرى مەن قاۋىپسىزدىگى. بارلىق تەحنيكا مەن مۇمكىندىكتەر جۇمىلدىرىلۋى ءتيىس. ءقازىر وسكەمەن مەن پاۆلوداردان كومەك كەلە جاتىر. تاڭەرتەڭ تىكۇشاقپەن ءورت بولعان اۋماقتى شولىپ شىعامىن. جاعداي تىكەلەي باقىلاۋىمدا بولادى، – دەدى بەرىك ءۋالي.
قازىرگى ۋاقىتتا ەڭ باستىسى، ەلدى مەكەندەرگە ءقاۋىپ ءتونىپ تۇرعان جوق. ايماقتاعى احۋال تولىق قاداعالانىپ وتىر.
