Búgin Shahtinsk qalasynyń soty "Qazaqstan" shahtasyndaǵy órt pen bes shahterdiń ólimine kináli dep tanylǵan tórt aiyptalýshyǵa úkim shyǵardy. Qaiǵyly oqiǵa shahta "ArselorMittal Temirtaý" (AMT) kompaniiasynyń ieliginde bolǵan kezeńde bolǵan, dep habarlaidy Dalanews.kz Kaztagqa siltep.
Sýdia Daniiar Almenov sot úkimin jariialady.
"Aiyptalýshylardy tórt jylǵa bas bostandyǵynan aiyryp, jazany qaýipsizdigi tómen koloniiada óteý týraly jáne úsh jyl boiy taý-ken óndirisi salasyndaǵy basshylyq qyzmetterdi atqarý quqyǵynan aiyrý týraly sheshim qabyldandy. Olardyń kinási tolyq dáleldendi: jumys barysyndaǵy zańbuzýshylyqtarǵa qaramastan, óndiristi toqtatpaǵany, ortasha janǵyshtyqtaǵy tasymaldaý lentasyn ornatqany jáne jóndeý aýysymynda tazalaý men jonýǵa ruqsat qaǵazy berilmegeni anyqtaldy", – dedi sýdia.
Sot aiyptalýshylardy "taý-ken jáne qurylys jumystary kezinde qaýipsizdik erejelerin buzý, abaisyzda eki nemese odan da kóp adamnyń ólimine ákelý" baby boiynsha kináli dep tapty. Sýdia sot zalynda barlyq aiyptalýshylardy qamaýǵa alýǵa úkim shyǵaryp, jaza merzimin olardy ustaǵan kúnnen bastap esepteý týraly sheshim qabyldady. Sondai-aq, úiqamaqta bolǵan ýaqyttary jalpy jaza merzimine qosyldy. Úkimge shaǵym túsirýge bolady.
Alaida, sot qaza bolǵan shahterlerdiń otbasylarynyń moraldyq shyǵyndy óndirý týraly talap-aryzyn qanaǵattandyrýdan bas tartty.
