بۇگىن شاحتينسك قالاسىنىڭ سوتى "قازاقستان" شاحتاسىنداعى ءورت پەن بەس شاحتەردىڭ ولىمىنە كىنالى دەپ تانىلعان ءتورت ايىپتالۋشىعا ۇكىم شىعاردى. قايعىلى وقيعا شاحتا "ارسەلورميتتال تەمىرتاۋ" (امت) كومپانياسىنىڭ يەلىگىندە بولعان كەزەڭدە بولعان، دەپ حابارلايدى Dalanews.kz كازتاگقا سىلتەپ.

سۋديا دانيار المەنوۆ سوت ۇكىمىن جاريالادى.

"ايىپتالۋشىلاردى ءتورت جىلعا باس بوستاندىعىنان ايىرىپ، جازانى قاۋىپسىزدىگى تومەن كولونيادا وتەۋ تۋرالى جانە ءۇش جىل بويى تاۋ-كەن ءوندىرىسى سالاسىنداعى باسشىلىق قىزمەتتەردى اتقارۋ قۇقىعىنان ايىرۋ تۋرالى شەشىم قابىلداندى. ولاردىڭ كىناسى تولىق دالەلدەندى: جۇمىس بارىسىنداعى زاڭبۇزۋشىلىقتارعا قاراماستان، ءوندىرىستى توقتاتپاعانى، ورتاشا جانعىشتىقتاعى تاسىمالداۋ لەنتاسىن ورناتقانى جانە جوندەۋ اۋىسىمىندا تازالاۋ مەن جونۋعا رۇقسات قاعازى بەرىلمەگەنى انىقتالدى"، – دەدى سۋديا.

سوت ايىپتالۋشىلاردى "تاۋ-كەن جانە قۇرىلىس جۇمىستارى كەزىندە قاۋىپسىزدىك ەرەجەلەرىن بۇزۋ، ابايسىزدا ەكى نەمەسە ودان دا كوپ ادامنىڭ ولىمىنە اكەلۋ" بابى بويىنشا كىنالى دەپ تاپتى. سۋديا سوت زالىندا بارلىق ايىپتالۋشىلاردى قاماۋعا الۋعا ۇكىم شىعارىپ، جازا مەرزىمىن ولاردى ۇستاعان كۇننەن باستاپ ەسەپتەۋ تۋرالى شەشىم قابىلدادى. سونداي-اق، ءۇيقاماقتا بولعان ۋاقىتتارى جالپى جازا مەرزىمىنە قوسىلدى. ۇكىمگە شاعىم تۇسىرۋگە بولادى.

الايدا، سوت قازا بولعان شاحتەرلەردىڭ وتباسىلارىنىڭ مورالدىق شىعىندى ءوندىرۋ تۋرالى تالاپ-ارىزىن قاناعاتتاندىرۋدان باس تارتتى.