Abai oblysynyń ákimi Berik Ýáli Semeidegi halyq jii baratyn demalys oryndaryn aralap, aspaly kópirde júrgizilip jatqan jóndeý jumystarynyń barysymen tanysty,- dep habarlaidy Dalanews.kz
Qazirgi ýaqytta oblys ortalyǵynyń qos jaǵalaýyn bailanystyryp turǵan aspaly kópirdiń asfalt jabynyn tolyq aýystyrý jumystary qarqyndy júrgizilýde. Mamandardyń aitýynsha, asfalt jabynyn qyryp alý aiaqtalýǵa jaqyn. Erteńnen bastap kólik ótkeline arnaiy material tóseý jumystary bastalady. Bul jumys osy salanyń bilikti mamandarynyń qatysýymen, kópirlerge arnalǵan tehnologiialar boiynsha júrgiziledi.
Asfaltty aýystyrýǵa 80-ge jýyq jumysshy jáne 20-dan astam arnaiy tehnika tartylǵan. Joba boiynsha jóndeý jumystary shilde aiynyń basynda aiaqtalady dep josparlanyp otyr.
Aimaq basshysy sol jaǵalaýdaǵy kópir astyndaǵy qoǵamdyq keńistikti kórdi. Munda mýraldar beinelenip, birneshe sporttyq alańdar ornatylǵan. Amfiteatr, fýd-kort jáne otbasylyq meiramhana bar. Alaida abattandyrý, kógaldandyrý jumystary syn kótermeidi.
Oblys ákimi Beibitshilik aralyndaǵy balalar temirjolyn, etnoaýyldy, sport aimaqtaryn, eskertkishter ornalasqan aýmaqtardy aralap kórdi. Qala turǵyndary men qonaqtary kóp keletin demalys ornynda birqatar máseleler bar. Ásirese kógaldandyrý jumysy kóńil kónshitpeidi. Aǵashtar sýǵarylmai, qýrap ketken. Qaraýsyz qalǵan. Qoǵamdyq dárethanaǵa, qyzmet kórsetý oryndarynyń azdyǵyna bailanysty halyq tarapynan jii shaǵym aitylady.
Aimaq basshysy halyq eń kóp keletin eki demalys ornyndaǵy kógaldandyrý jumystaryn synǵa alyp, Semei qalasy ákiminiń mindetin atqarýshy Bekjan Bapyshevqa tazalyqqa jaýapty mekemelerdiń jumysyn retke keltirýdi tapsyrdy.
«Búgin Semeidegi halyq eń kóp keletin demalys oryndaryn arnaiy aralap, jaǵdaiymen tanystym. Sol jaǵalaýdaǵy kópir astyndaǵy qoǵamdyq keńistikti de, Beibitshilik aralyn da tezirek retke keltirý kerek. Tazalyqqa jaýapty mekeme óz jumysyna salǵyrt qaraǵan. Aǵashtar sýǵarylmaǵan. Kógaldar sarǵaiyp, kúiip ketken. Tehnikalar adamdar demalyp otyratyn oryndyqtarǵa zaqym keltirgen. Qoqys jinalmaǵan. Bul eki oryn da qaladaǵy halyq eń kóp keletin jerler. Qala ákiminiń mindetin atqarýshy Bekjan Bapyshevqa qiraǵan, zaqym kelgen dúnielerdi qalpyna keltirýdi tapsyramyn»,- dedi oblys ákimi.
