Abai oblysy ákimi Berik Ýáli óńir turǵynynyń ómirin saqtap qalǵan Almaty kópsalaly klinikalyq aýrýhanasynyń ujymyna olardyń kásibi sheberligi men jankeshti eńbegi úshin rizashylyǵyn bildirdi, – dep habarlaidy Dalanews.kz Abai oblysy ákiminiń baspasóz qyzmetine silteme jasap.
Júktiliktiń 28-aptasynda bolǵan oblys turǵyny gemorragiialyq shok diagnozymen asa aýyr jaǵdaida atalǵan aýrýhanaǵa jetkizilgen. Dárigerler shuǵyl ota jasap, naýqasqa der kezinde búirek qyzmetin kórsetetin apparatty («jasandy búirek») qosqan.
Meditsina qyzmetkerleriniń úilesimdi jáne bilikti áreketiniń arqasynda patsienttiń jaǵdaiy qalypqa keltirilgen. Qazir ol jansaqtaý bóliminen tiisti mamandandyrylǵan bólimshege aýystyryldy.
Aimaq basshysy dárigerlerdiń kásibi birligi men zamanaýi tehnologiialardyń arqasynda patsienttiń ómirin saqtap qalý múmkin bolǵanyn atap ótti.
– Ana men balanyń ómirin saqtaý – memleketimizdiń basym baǵyttarynyń biri. Muny Prezidentimiz únemi aityp keledi. Biz úshin árbir ana men sábidiń ómiri qymbat. Ózimniń jáne Abai oblysy turǵyndarynyń atynan Almaty kópsalaly klinikalyq aýrýhanasynyń ujymyna alǵysymdy aitamyn, – dedi oblys ákimi.
