Indýstrıaldy aımaqtaǵy jobalar sanynyń ósýine qaraı, jumys oryndarynyń sany budan ári de ósetin bolady. Bul týraly QR Premer-mınıstriniń orynbasary Jeńis Qasymbektiń Almaty oblysyna jasaǵan jumys sapary kezinde belgili boldy.
Almaty oblystyq kásipkerlik jáne ındýstrıaldy ınovasıalyq damý basqarmasynyń basshysy Rýslan Qojasbaevtyń aıtýynsha, «Bereke» ındýstraıldy aımaǵynyń jalpy kólemi 535 gektar. Ázirge onyń aýmaǵynda 8 kásiporyn ornalasýda, olardyń arasynda «Green Land Alatau», «KazAgroTech», «Nur Tóbe» jylyjaılary, «Darhan MNM» aıaq kıim fabrıkasy, «Mekada» qurylys kompanıasy syndy kásiporyndar bar.
Osy jobalar júzege asyrylǵanda 1620 jańa jumys orny qurylatyn bolady.
Qazirgi kezde olarǵa jer bólý, jobalaý qujattaryn daıyndaý jumystary júrgizilýde. Indýstrıaldy aımaqtyń ınjenerlik júıesiniń qurylystaryna aldyn ala esepteý boıynsha 7,6 mlrd. teńge qajet. Memlekettik saraptamadan ótkennen keıin bul soma naqtylatyn bolady.
Sol sıaqty osy jerde vıse-premerge «Gate City»jobasynyń bas josparyna engizilgen, kelisilgen túzetýler týraly baıandaldy. Aýmaqtaǵy jelilerdi esepke alǵandaǵy turǵyn úıler salý kezeńderi, turǵyn aýdandardyń aýmaǵyn abattandyrý, jeke turǵyn úıler salý jóninde keńinen sóz boldy.
Bolat Tákenovtiń aıtýynsha, óńir basshysyna berilgen tapsyrmaǵa sáıkes ońtústiktegi birinshi qalanyń magıstraldyq ınjenerlik jelileri aıaqtalǵan. Sýmen qamtý júıesiniń jalǵastyrý jelileri, 202 Gkal qýattylyqtaǵy magıstraldy jylý trassasy bar sý jylytý qazandyǵy, qosalqy stansalar, 2000 tekshelik sý jınaǵysh jasalǵan.
Sonymen qatar turǵyn úılerge tartylatyn kóshe ishindegi ınjenerlik jelilerdiń qurylysyn jobalaý jumystary da bitken. Olardy salýǵa respýblıkalyq búdjetten qarjy bólinedi. Bul oraıda oblys ákimi oblystyq qurylys basqarmasyna áleýmettik nysandardy jobalaý isin bastaýdy tapsyrylǵan. Sonymen birge Amandyq Batalov turǵyn úıler qurylysyn bastaý jumystaryn qýzaý kerektigin aıtty:
– Bizde qazir alańy 600 myń sharshy metr bolatyn turǵyn úıler qurylysy úshin magıstraldyq jeliler daıyn. Birinshi kezegi 300 myń sharshy metrdi quraıdy. Turǵyn úı massıviniń qurylysyn bastaýdy jyldamdatý qajet. Sebebi, oblysta áli 40 myńnan astam adam úı kezeginde tur. Ásirese, kóp balaly otbasylardy, halyqtyń áleýmettik áljýaz toptaryn baspanamen qamtý qajettiligi bar, – dep atap ótti oblys ákimi.
Baıandamashylardy tyńdaǵan vıse-premer bul másele boıynsha jaýapty tulǵalardyń qatysýymen arnaıy jıyn ótkizetinin aıtty.
Budan keıin Úkimet basshysynyń orynbasary «Mareven Fýd Tán-SHan» zaýytynda da boldy.
Resmı delegasıa óndiristik sehtardy, daıyn ónimder qoımasyn aralady. Aralaý barysynda kásiporyn dırektory brıkettegi jáne jaımadaǵy tez daıyndalatyn «Rollton» kespesin, «Rollton-Domashnıı» sorpasyn ázirleý prosesteri týraly aıtyp berdi.
Sapar sońynda Jeńis Qasymbek bul zaýytty ótken jyly Indýstrıalandyrý kúninde Elbasy iske qosqanyn, kásiporynnyń Orta Azıada teńdesi joq ekenin eske saldy. Zaýytqa memleket tarapynan qajetti qoldaýlar jasalǵan. Eń bastysy, munda 370 jumys orny qurylǵan.
Almaty oblysy ákiminiń baspasóz qyzmeti
